Bushi: Kryeministri ka fyer gjithë shqiptarët

02-12-2007

Pas deklaratave të Kryeministrit Berisha në lidhje me ekipin kombëtar, i ashpër ka qenë edhe reagimi i kryegolshënuesit të ekipit kombëtar Alban Bushi. I kontaktuar nga "Gazeta Shqiptare", "Loku" pohoi nga Greqia se Kryeministri ndoshta ka dëgjuar diçka, por e ka dëgjuar në mënyrë të gabuar. "Mesa kam kuptuar unë, ai nuk merr vesh fare nga futbolli. Si mund të thuash që u shit ndeshja apo gjëra të tilla? Ndoshta ai një lloj informacioni, po për mendimin tim është i gabuar", deklaroi sulmuesi kuqezi që nga Selaniku, ku ka qenë dje i grumbulluar me skuadrën e Apollon Kallamariasë. Në fakt, Bushi nuk ka dashur të krijojë tensione me kreun e qeverisë, pasi sipas tij nuk është e hijshme të merresh me një kryeministër. Por, për të, kjo deklaratë është shumë e nxituar dhe e gabuar. "Kombëtarja është e të gjithë shqiptarëve dhe mendoj se Kryeministri i ka turpëruar të gjithë ata duke deklaruar se ajo ka shitur flamuri. Unë nuk dua të flas keq, pasi kam frikë se mos nesër ai del dhe kërkon falje. Megjithatë një Kryeministër nuk duhet të flasë kështu. Si mund të thuhet që ne donim të hiqnim Bariçin? Shumë nga çunat do të mbeten padyshim të ofenduar nga kjo deklaratë, por nuk di çfarë të them më tepër. Për mendimin tim, e përsëris, që ai di diçka, ka një informacion pasi është kryeministër, por e ka të gabuar", u shpreh më tej sulmuesi i përfaqësueses shqiptare. Në fakt, nga deklarata e bërë nga kreu i ekzekutivit kanë mbetur të ofenduar edhe lojtarë të tjerë, por që për arsye të ndryshme nuk pranuan të reagonin ashpër ndaj personit që drejton qeverinë shqiptare.

Gazeta Shqiptare