Lala: Ndeshja po shkonte drejt barazimit

I pakënaqur për rezultatin në fund të takimit ka qenë edhe mesfushori i kombëtares sonë

07-09-2006

I pakënaqur për rezultatin në fund të takimit ka qenë edhe mesfushori i kombëtares sonë, Altin Lala. "Motori" i Hanoverit, ndonëse nuk ka luajtur për 90 minuta, nuk e fsheh mërzitjen për humbjen e djeshme. Lala pranon se loja e kombëtaresstonë gjatë gjithë ndeshjes nuk ka qenë shumë e organizuar. Rumunët luanin më mirë dhe në mesfushë ishin gjithnjë superiorë ndaj skuadrës sonë. Gjithsesi, fatet e takimit i vendosi një gabim fatal i skuadrës sonë. Lala ka shtuar se një gabim i tillë në kësisoj rastesh dhe në ndeshje ndërkombëtare vendos takimin.
"Ishte një humbje që djeg. Loja e ekipit tonë nuk ishte e organizuar siç ishte loja e Rumanisë në këtë ndeshje. Patëm vështirësi në mbulimin e lojtarëve në mesfushë. Kundërshtarët tanë ishin gjithmonë një lojtar më shumë në mesfushë. Siç po shkonte loja, ishte një takim që duhet të mbyllej 0 0, por ne bëjmë gabime. Fatkeqësisht, mund t'i ndodhë çdo njeriu dhe pas gabimit të bërë u humb edhe loja," është shprehur Lala.
Mesfushori i kombëtares sonë, veç analizës së lojës, ka shpjeguar përse ndodhi një gabim i tillë në momentin më kyç të takimit, ku nga të gjithë kërkohej gjakftohtësi. "Pse ndodhi? Duke luajtur gjithmonë në maksimum duhet të mos gabosh sepse dëmton ekipin. Por sado të vogël të bësh gabimin, në ndeshje ndërkombëtare mund të rezultojë fatale," është shprehur Lala.

Beqaj: Rumania e meritoi fitoren
Lojtarët e ekipit kombëtar, pas humbjes 2 0 me Rumaninë, normalisht nuk kanë qenë të gëzuar. Dy gola për shkak të gabimeve të lojtarëve tanë kanë ndëshkuar moralisht ekipin që pas pësimit të golit të parë, duket se dorëzoi armët. Pas golit skuadra humbi qetësinë dhe freskinë fizike, duke u lejuar kundërshtarëve që të dominojnë lojën. I këtij mendimi është edhe portieri i kombëtares sonë, Arjan Beqaj. Ky i fundit është munduar dje të japë maksimumin në fushën e lojës, ndonëse e gjithë skuadra nuk ka qenë në një ditë të mirë. Gjithsesi, Beqaj pranon që rumunët e merituan fitoren.
"Të them të vërtetën, ishte një ndeshje që, ashtu si shkoi, nuk duhej ta kishim humbur. Gjithsesi, Rumania është një ekip shumë i fortë. Ka lojtarë shumë të mirë, që mund të bëjnë diferencë në çdo ekip. Në ndeshjen e sotme loja ndryshoi pikërisht në momentin kur mund të mbetej atje ku ishte. Pas gabimit, skuadra pësoi një gol. Ky është futbolli. Në një ndeshje futbolli këto gjëra ndodhin, ndonëse ekipi i Rumanisë i shfrytëzoi më së miri rastet dhe shënoi golin që na ndëshkoi. Pikërisht në këtë pikë ishte dhe diferenca mes dy ekipeve. Ekipet e mira nuk të lejojnë të bësh asnjë gabim. Gjithsesi, në përgjithësi mund të them se Rumania ishte një ekip më i mirë se ne dhe kjo bëri diferencën," ka përfunduar Arjan Beqaj. Portieri i kuqezinjve, ndonëse nuk e ka shprehur mërzitjen për humbjen, është larguar i mërzitur nga stadiumi pas kësaj humbjeje shumë të hidhur të kombëtares shqiptare dje në "Qemal Stafa". Realisht Beqaj është kthyer si portier i parë i kombëtares shqiptare pas shumë kohësh. Kosovari ka marrë besimin e trajnerit Bariç, edhe pse paraardhësi i kroatit Brigel nuk e ka pasur shumë për zemër.


"Qemal Stafa" braktiset pjesërisht nga tifozët
Edhe pse kombëtaren tonë e priste një ndeshje shumë e vështirë, kundër një kundërshtari që është në "pole-position" për të kaluar grupin, ku bëjmë pjesë ne, interesimi i tifozërisë kuqezi nuk qe në nivelin e pritshëm. Në fakt, ishte parashikuar një bojkot i pjesshëm nga tifozët e kombëtares, pasi çmimet e biletave për këtë ndeshje qenë shumë të larta, në krahasim me nivelin ekonomik të vendit tonë. Një biletë në tribunë kushtonte 5 mijë lekë, ndërsa biletat e karshisë varionin nga 3 mijë deri në 2 mijë lekë. Vetëm në rastet kur në "Qemal Stafa" kanë zbritur skuadra të tilla si Gjermania e Anglia, biletat e stadiumit kanë qenë kaq të shtrenjta si me Rumaninë. Rreth një e treta e kapacitetit të ndërkombëtarit tonë ka qenë e boshatisur, pasi një pjese të mirë të shqiptarëve nuk ua ka mbajtur xhepi për të paguar qimet e kokës për një ndeshje futbolli. Madje ky bojkot u paralajmërua nga shoqata "Tifozët kuqezinj", të cilët deklaruan hapur se nuk do të shkonin në stadium për të përkrahur kombëtaren. Binte në sy prania e tifozovë kosovarë "Prishtina-Plisat" dhe grupi i dardanëve, që gjithmonë kanë qenë mbështetje e madhe për skuadrën tonë përfaqësuese. Madje edhe numri i tyre ka qenë disi i reduktuar, pikërisht për shkak të çmimit të lartë të biletave. Pjesët anësore të "Qemal Stafës", sidomos ajo e jugut, kanë qenë shumë pak të populluara. Nëse FSHF-ja vazhdon të ndjekë këtë politikë, atëherë ndaj Holandës çmimi i biletave, më sa duket, do t'i kalojë edhe ato europiane.

Olsi Avdiaj

Sporti Shqiptar