Skela: Gol për Krisin dhe fëmijët shqiptarë

Kapiteni i Shqipërisë nëse do të shënojë qoftë dhe një gol kundër Andorrës do të barazonte rekordmenin Alban Bushi, me 14 gola

Kapiteni i Shqipërisë, Ervin Skela, njëherësh edhe golashënuesi më i mirë i kuqezinjve në pesë miqësoret e drejtuar nga Josip Kuzhe, me 3 gola (dy kundër Qipros, një kundër Irlandës së Veriut), ka shansin e madh në rast të një goli ndaj Andorrës të barazohet me rekordmenin absolut të Kombëtares, Alban Bushin (14 gola).

Skela, një prej lojtarëvë më të mirë të Shqipërisë në 20 vitet e fundit, është në kuotën e 13 golave, një pak se “Loku”, i tërhequr përfundimisht nga Kombëtarja dhe një më shumë se Erjon Bogdani (12 gola, ende në aktivitet). Me 11 gola është Altin Rraklli, ndërkohë që me 10 gola janë Igli Tare dhe Sokol Kushta.

Skela në konferencën për shtyp para ndeshjes me Andorrën: “Do të gëzoja shumë nëse do të shënoja dhe këtë gol do t’ia dedikoja djalit tim (Krisit), e gjithashtu fëmijëve shqiptarë, duke qenë se sot kishin festën e tyre, pra 1 qershorin. Gjithsesi, një fitore tjetër brenda pak ditëve do të ishte një kënaqësi e madhe për çdo tifoz. Nuk ka rëndësi se me kë luajmë”.

Në takimin kundër Malit të Zi, Skela luajti vetëm 18 minuta pasi u zëvendësua pas një dëmtimi në kokë, gjatë një përplasjeje me Xhudoviç. Skela, me 8 gola në miqësore mban edhe një rekord tjetër të golave në miqësore, pasi la pas vetes edhe mbrojtësin Adrian Aliaj (7 gola).

Skela, ende pa një ekip pas rënies së Tus Koblenz në Bundesligën 3 gjermane, tha për ndeshjen kundër Andorrës: “Në radhë të parë shpresoj që të dalim mirë, sepse ç’është e vërteta na pret një ndeshje shumë e vështirë, pavarësisht emrit të kundërshtarit. Tani nuk ka më ekipe të ashtuquajtura të mëdha apo të vogla, të gjithë dinë të luajnë futboll. Duke parë edhe rezultatet e fundit të Andorrës, për më tepër që ndaj tyre pati shumë vështirësi edhe Anglia, mendoj se për ne nuk do të jetë aspak e lehtë”.

13 golat e Skelës
1. Turqi- Shqipëri, 0-2, Miqësore
2. Irlandë-Shqipëri, 2-1, Zyrtare
3. Zvicër-Shqipëri, 3-2, Zyrtare
4. Maqedoni-Shqipëri, 3-1, Miqësore
5. Shqipëri-Suedi, 2-1, Miqësore
6. Shqipëri-Gjeorgji, 3-2, Zyrtare
7. San Marino-Shqipëri, 0-3, Miqësore
8. Bjellorusi-Shqipëri, 2-2, Zyrtare
9. Luksemburg-Shqipëri, 0-3, Zyrtare
10. Azerbajxhan-Shqipëri, 1-1, Miqësore
11. Shqipëri-Qipro, 6-1, Miqësore
12. Shqipëri-Qipro, 6-1, Miqësore
13. Shqipëri-Irlanda e Veriut, 1-0, Miqësore

TETË GOLAT NË MIQËSORE

Ja dhe tetë golat në miqësore të kapitenit aktual të Shqipërisë, shirit që e ka mbajtur në ndeshjet e fundit. Skela e ka shënuar golin e tij të parë në një ndeshje miqësore, në fitoren 2-0 kundër Turqisë në Gaziantep (25.04.2001). Të dytin e ka shënuar kundër Maqedonisë, në humbjen 3-1 në Prilep (20.05.2003), të tretin në fitoren 2-1 kundër Suedisë në Tiranë, më 18.02.2004. Goli i katërt i tij në një ndeshje miqësore është ai kundër San Marinos (3-0, 16.08.2006). Të pestin e ka shënuar në miqësoren kundër Azerbajxhanit (1-1) në Baku (19.11.2008); të gjashtin e të shtatin në miqësoren kundër Qipros (2-1, 12.08.2009) dhe të tetin, ai kundër Irlandës së Veriut (1-0, 03.03.2010).

Albania-sport.com, 2010-06-02