Kuzhe: Andorra, test i rëndësishëm për fazën kualifikuese të Euro 2012

Siç e ka bërë zakon, një ditë para ndeshjeve, trajneri i kombëtares shqiptare, Josip Kuzhe, ka zhvilluar një konferencë për shtyp me gazetarët, ku ka bërë të ditura edhe planet e tij. Mesditën e së martës, në hotel “Dyrrahu”, në bregdetin e Durrësit, ku është e akomoduar kombëtarja kuqezi prej disa ditësh, Kuzhe ka dalë para gazetarëve dhe u është përgjigjur pyetjeve të tyre mbi miqësoren me Andorrën.

Që në krye të herës, kroati ka nënvizuar faktin se “ndeshja ndaj Andorrës, ashtu si ajo me Malin e Zi, do të jetë e rëndësishme, pasi do të testohen disa lojtarë të rinj në prag të eliminatoreve për Kampionatin Europian të vitit 2012, që do të zhvillohet në Poloni dhe Ukrainë. Shqipëria bën pjesë në grupin D, në këto eliminatore, së bashku me Francën, Bjellorusinë, Bosnjen, Rumaninë dhe Luksemburgun, ndaj kam ndjekur gjatë këtyre ditëve disa ndeshje të kundërshtarëve tanë, të cilët kanë humbur në miqësoret e tyre. Megjithatë, ne duhet të jemi në rregull për vete, së pari, pastaj të mundohemi të evidentojmë pikat e dobëta të rivalëve. Andorra na jep një tjetër mundësi për të kolauduar lojën tonë, për të eksperimentuar lojtarë të ndryshëm për role të veçanta. Natyrisht, pikë së pari duam të fitojmë, madje me disa gola, sepse kështu krijojmë dhe ruajmë një atmosferë pozitivë në skuadër, para nisjes së fazës kualifikuese në grupet e Euro 2012. Në ndryshim nga ndeshja me Malin e Zi, këtë herë kemi katër mungesa të rëndësishme, të titullarëve të ekipit kombëtar, si Lorik Cana, Debatik Curri, Erjon Bogdani dhe Armend Dallku. Sidoqoftë, përderisa bëhet fjalë për një miqësore ndaj Andorrës, dua të nënvizoj se kjo nuk do të jetë një problem. Unë llogaris që në eliminatoret e adhshme, që fillojnë në shtator, do të luajmë me 22 apo 23 futbollistë dhe normalisht që duhet t’i jepet mundësia gjithsecilit të luajë dhe të tregojë veten. Kam besim te të gjithë lojtarët që kam në grumbullim dhe nuk mendoj se mungesa e 4 titullarëve do të jetë kaq e rëndësishme ndaj Andorrës”, - ka pohuar Kuzhe.

Ndërkohë, trajneri kroat i kombëtares zbuloi edhe formacionin me të cilin Shqipëria do ta nisë miqësoren me Andorrën. Kështu, në portë do të luajë sërish Hidi. Në krahët e mbrojtjes do të luajnë Vangeli dhe Agolli, ndërsa në qendër të mbrojtjes do të jetë një dyshe e kampionatit shqiptar, e përbërë nga mbrojtësi i Besës, Endri Vrapi, dhe mbrojtësi i Tiranës, Andi Lila. Në mesfushë do të jenë Bulku, Duro, Hyka, Skela, ndërsa në sulm do të luajë dyshja Salihi-Kapllani.

I pyetur mbi pritshmëritë e tij nga grupi D kualifikues, ku bën pjesë edhe Shqipëria, Kuzhe ka përsëritur: “Francën e konsideroj si më të vështirën e grupit. Pashë ndeshjen mes Bjellorusisë dhe Hondurasit, të zhvilluar në Austri javën e shkuar dhe kundërshtarët tanë më lanë përshtypje të mirë. Edhe takimet miqësore që kemi zgjedhur janë pikërisht testim për eliminatoret ndaj këtyre lloj skuadrave.”

Ndërkohë, të martën, në orën 18:00, kombëtarja shqiptare do të zhvillojë stërvitjen e fundit në qytetin e Durrësit, ndërsa të mërkurën do të zhvillojë ndeshjen miqësore ndaj Andorrës, në orën 20:00, në stadiumin kombëtar “Qemal Stafa.

Pjesën e parë titullarët, pjesën e dytë kandidatët

Trajneri i kombëtares kuqezi, Josip Kuzhe, e ka gati planin për miqësoren me Andorrën, e cila do të luhet mbrëmjen e 2 qershorit në “Qemal Stafa”. Në pjesën e parë do të kërkojë golat, në mënyrë që të sigurojë fitoren, përmes formacionit titullar (përjashto 4 mungesat e Dallkut, Canës, Currit dhe Bogdanit, që morën leje), ndërsa në pjesën e dytë do të ketë vend për elementin e ri, kandidatë për kombëtaren. Kjo do të thotë se në nisje të miqësores në fjalë, porta do t’i besohet Isli Hidit, ndërsa në pjesën e dytë vendin e tij do ta zërë “gardiani” i Laçit, Ervin Llani, si debutues kuqezi. Kuzhe, edhe pse nuk do të ketë në dispozicion tre lojtarë titullarë në prapavijës, Dallkun, Canën dhe Currin, duket se ka përftuar një mbrojtje, që jep garanci. Kristi Vangjeli duket plotësisht i rikuperuar nga dëmtimi në gju dhe do të luajë në krahun e djathtë, ndërsa Ansi Agolli do të rreshtohet në të majtë. Dyshja e qendrës pritet të përbëhet nga Endri Vrapi dhe Andi Lila. Spostimi i këtij të fundit në repartin difensiv ka lënë një hapësirë në mesfushë për Jahmir Hykën. Pasi shkëlqeu përballë Malit të Zi, shtatshkurtëri kuqezi do të luajë në të majtë, ndërsa Hamdi Salihi do të jetë në pozicion disi më të avancuar nga e djathta. Ervin Bulku dhe Klodian Duro do të luajnë përpara mbrojtjes, më së shumti si shkatërrues, ndërsa Ervin Skela do të ketë sërish detyrën për të organizuar manovrat sulmuese. Edmond Kapllani do ta nisë ndeshjen si titullar, i mbështetur nga krahët prej Salihit dhe Hykës. Në pjesën e dytë, nëse gjithçka shkon sipas parashikimeve të stafit kuqezi, pra sigurohet një fitore me më shumë se një gol, duket se shanse aktivizimi do të ketë për Ditmar Bicaj, në mbrojtje, Emiljano Veliaj, në mesfushë, dhe Parid Xhihanin e Ahmed Januzin, në sulm. Po kështu, edhe Bakaj, Vila, Muzaka apo Lika presin shansin të tregojnë formën e tyre sportive.



Nga Andorra, John Joseph Blasco

Alvarez: Shqipëria, ”provim” për lojtarët e mi!

Është koha për të bërë disa ndryshime dhe eksperimente në kombëtaren e Andorrës, kështu që trajneri Koldo Alvarez ka përpiluar një listë lojtarësh të mirë, në përpjekje për të vënë në zbatim projektin e tij për vazhdimësinë. Andorra ka disa lojtarë të dëmtuar, që nuk mund të jenë pjesë e kësaj miqësoreje, prandaj janë zgjeruar mundësitë që elementë të tjerë të rinj, të perspektivës, të ftohen nga trajneri Alvarez. Ky i fundit, edhe për këtë arsye, ka thirrur katër debutues me fanellën e kombëtares për miqësoren e 2 qershorit në Tiranë. Emrat e këtyre lojtarëve të rinj janë: Oskar Sonejeë, Xavier Gil, David Ribolleda dhe Genis Garcia. Ky i fundit zëvendësoi Aleks Martinez për arsye teknike. “Një nga objektivat e mi në kësi ndeshjesh miqësore është për të provuar numrin maksimal të lojtarëve që mund t’i shërbejnë ekipit kombëtar, kështu që do të vazhdojmë në të njëjtën linjë edhe në Tiranë. Këtë ndeshje miqësore do ta përdorim si një test për të gjithë lojtarët e thirrur, pastaj të shohim se ç’mund të arrijmë më pas, edhe për rezultatin ‑ tha trajneri i Andorrës. - Kam besim se lojtarët do ta vlerësojnë maksimalisht këtë mundësi, sepse duhet të kenë punuar me ndërgjegjie edhe në klubet e tyre.”

Në lidhje me debutimin në stolin e kombëtares së Andorrës, ndeshjen paraardhëse miqësore në Rekjavik, Alvarez nënvizoi: “E nisa me një humbje të thellë, 4‑0, drejtimin e kombëtares së Andorrës dhe për këtë më vjen shumë keq. Nëse i referohesh këtij rezultati shkatërrues, mendon se vetëm sa jemi paraqitur në fushë, në Rekjavik, por të gjithë bien dakord se këto shifra nuk tregojnë lojën që u zhvillua në fushë. Pra, është e qartë, në lidhje me rezultatin, nuk ishte një debutim ëndërr për mua si trajner i Andorrës, por jemi mjaft të lumtur për shumë gjëra që kemi parë. Ne kishim punuar para kësaj miqësoreje dhe shumë gjëra të mira u reflektuan në terren. Shpresojmë që në Tiranë t’i shpëtojmë një ndëshkimi të tillë kontradiktor. Pra, të luajmë mirë dhe të marrim edhe ndonjë rezultat pozitiv.”

Andorra ruan një kujtim të bukur, madje edhe frymëzues për miqësoren e 2 qershorit në Tiranë, sepse më 17 prill 2002, në stadiumin “Andorra la Vella” do të triumfonte ndaj Shqipërisë 2‑0, në një ndeshje të këtij lloji. Tani radhën e ka stadiumi “Qemal Stafa” i kryeqytetit shqiptar, për t’u dhënë drejtim edhe statistikave direkte.

Sporti Shqiptar, 2010-06-02