Gilman Lika: Dua të lë gjurmë me Andorrën

Mesfushori shkodran e shikon një mundësi të artë miqësoren me Andorrën për të qenë në planet e Kuzhes

Në ndeshjen me Malin e Zi vetëm pesë lojtarë nga të rinjtë patën mundësi të aktivizoheshin disa minuta. Testi i vërtetë për ta, ashtu siç ka theksuar dhe tekniku Kuzhe, është përballja me Andorrën në “Qemal Stafa”. Në ndeshjen e 2 qershorit në përfaqësuese nuk do të jenë disa lojtarë me statusin e veteranëve në ekip, duke u krijuar hapësira aktivizimi futbollistëve më të rinj.

Pritet që pjesa më e madhe e tyre të aktivizohet, pasi është e rëndësishme që të evidentohen dhe konfirmohen elementët e perspektivës. Një prej tyre është dhe Gilman Lika, lojtar i Bolusporit në kampionatin turk. Futbollisti shkodran shprehet entuziast për këtë ndeshje dhe shpreson të ketë sa më shumë minuta në dispozicion.

“Ndeshja me Andorrën është sfida jonë. Unë personalisht e vlerësoj maksimalisht përballjen me këtë ekip dhe dëshiroj të lë gjurmë në të. Ndeshja cilësohet relativisht e lehtë, por unë dua ta vlerësoj në maksimum dhe të jap më të mirën time, pasi vetëm kështu mund t’i bëj vend vetes në ekipin kombëtar. Objektivi ynë i vetëm në këtë ndeshje, pa dyshim që është fitorja.

Do të mungojnë disa figura të rëndësishme të kombëtares, por mendoj se edhe zëvendësuesit e tyre janë të denjë dhe se do t’i realizojnë më së miri objektivat e përcaktuara nga tekniku Kuzhe. Këtë e them duke pasur parasysh edhe shkallën e vështirësisë së përballjes,”- nënvizoi Lika. Ashtu si dhe futbollistë të tjerë të ekipit tonë kombëtar, Lika shpreh vlerësime për teknikun kroat të pankinës sonë. “Me këtë trajner që kemi Shqipëria ka mundësi të shkojë larg. Ai është shumë i zgjuar, skuadrën e vendos si duhet në fushë dhe di mjaft mirë ta karikojë.

Për më tepër ka sjellë disa elementë të rinj në kombëtare, që me sa duket po rezultojnë shumë pozitivë. Shqipëria ka një mundësi të mirë për t’u përfaqësuar denjësisht në eliminatoret e europianit. Është plotësisht e mundur që ne të ngjitemi një vazo më lart, madje të shpresojmë edhe për më shumë, gjithmonë duke qenë të vetëdijshëm se kemi kundërshtarë shumë të fortë. Sa i përket të ardhmes sime, kam pasur disa oferta të mira nga disa klube me emër në Turqi. Unë kam edhe një vit kontratë me Bolusporin, kështu që më mbetet ta respektoj atë,”- përfundoi Gilman Lika.

Kuqezinjtë, vetëm një seancë stërvitore

Dje paradite kombëtarja ka zhvilluar seancën e radhës stërvitore në Kavajë, ku theksi i është vënë anës taktike. Pas ushtrime të nxemjes, trajneri Kuzhe i ka ndarë futbollistët në dy grupe me nga 9 futbollistë, që janë ndeshur mes tyre. Sot dhe nesër në Durrës në orën 18:00 do të zhvillohen dy seancat e fundit para takimit me Andorrën, të mërkurën, në orën 20:00, në “Qemal Stafa”.

Januzi: Do të jap maksimumin në kombëtare

Shtatlarti kosovar, që luan për Vorskën në Ukrainë, përkrah Currit e Dallkut, Ahmed Januzi, është thirrur për herë të parë në kombëtaren kuqezi. Dy vitet e fundit ka qenë pjesë e rëndësishme e Shpresës së Artan Bushatit, ndërsa Kuzhe e ka grumbulluar për herë të parë në kombëtare. Sulmuesi kosovar i Vorsklës e vlerëson shumë ftesën e Kuzhes dhe premton se do të bëjë më të mirën në kombëtare: “Unë kudo që të luaj, jap maksimumin tim. Kam qenë pjesë e Shpresës, ku jam munduar të jap më të mirën time.

Kur vesh bluzën e kombëtares, kjo ndjenjë rritet edhe më shumë. Kombëtarja mbetet ëndrra e të gjithëve e kur e arrin atë, atëherë duhet të mos kursesh asgjë që ta justifikosh veten,” - është shprehur Januzi. Këtë sezon, 22-vjeçari Ahmed Januzi është aktivizuar titullar me Vorsklën, duke qenë një nga pikat më të forta të sulmit. Aktivizimi i shpeshtë në Ukrainë e ka bindur Kuzhen që t’i japë shansin me Andorrën, më 2 qershor në “Qemal Stafa.”

Andorra, përfaqësuesja e vetëm tri fitoreve

Sportdashësit shqiptarë duhet ta kujtojnë mirë ndeshjen miqësore të vitit 2002, kur Andorra korri suksesin e parë në futboll, duke mundur 2 0 kombëtaren e Shqipërisë. Sulejman Demollari, ish trajneri i kuqezinjve në atë kohë, u shkarkua menjëherë nga detyra. Por cila është historia e Andorrës në futboll? Është jesë e UEFA s që nga viti 1994, ndërsa në FIFA u pranua vetëm dy vite më vonë.

Andorra është një principatë në krahinën e Katalunjës dhe shtrihet në mes të maleve Pirenej, në verilindje të Spanjës. Në veri kufizohet me Francën. Është vendi i 6 të më i vogël në Europë. Ka një sipërfaqje 468 km katror, ndërsa numri i popullsisë thuasje ka arritur 84 mijë banorë. Andorra ka zhvilluar gjithsej 88 ndeshje ndërkombëtare, prej të cilave ka mundur të fitojë 3, barazojë 9 dhe humbasë 76. Shqipëria, Maqedonia dhe Bjellorusia janë përfaqësueset e vetme që janë mundur në Andorrë.

Sporti Shqiptar, 2010-06-02