Salihi: Kujdes Andorrën, të gjithë dinë të luajnë!

Sulmuesi i Rapidit të Vjenës mbetet pika kryesore e sulmit kuqezi për miqësoren e 2 qershorit

Perla e tij në Podgoricë i bëri shqiptarët të ndihen më krenarë se kurrë. Shqipëria nuk fitoi thjesht një miqësore me Malin e Zi, por edhe respektin e kundërshtarit, që ndoshta nuk e kishte menduar kurrë se do të gjunjëzohej para tifozëve të vet nga fqinji jugor, Shqipëria. Hamdi Salihi vazhdon të jetë pjesë e grupit për ndeshjen e radhës miqësore me Andorrën, ku pritet të luajë që nga minuta e parë.

Entuziazmi i fitores me Malin e Zi për Salihin nuk duhet të ndikojë negativisht, sepse kundërshtari, sado modest të jetë, duhet vlerësuar. “Sidomos në futbollin e sotëm të gjithë dinë të luajnë futboll.

Nuk është si më parë, që diferencat mes skuadrave kanë qenë më të mëdha. Nëse kundërshtari është më i fortë, mund të përgatitësh një lojë me efikase mbrojtëse dhe e kundërta. Andorra vërtet është një kombëtare e vogël, por s’duhet nënvlerësuar. Ne duhet të bëjmë më të mirën dhe të zbatojmë të gjitha detyrat e trajnerit pa mendjemadhësi. Vetëm kështu do të arrijmë suksesin e radhës,” - është shprehur Salihi. Sezoni i ri futbollistik nis vrullshëm edhe për kombëtaren.

Shqipëria i nis eliminatoret në shtator në transfertë me Rumaninë dhe më pas në Tiranë me Luksemburgun. Salihi i ka idetë të qarta: duhet të synojmë objektivin më të arritshëm. “Duhet të jemi realistë për mundësitë tona. Objektivi ynë i parë është të ngjitemi një vazo më lart dhe më pas të synojmë për më shumë.

Kualifikimi është diçka shumë e vështirë për t’u arritur për një kombëtare si Shqipëria, ndaj duhet t’i marrim gjërat me qetësi. Futbollit ka surpriza dhe ne ndoshta mund të renditemi në vendet e para. Për këtë duhet edhe fat,” - vijon Salihi.

Pas dy sezoneve me Riedin në kampionatin austriak, Hamdi Salihi nënshkroi një kontratë 3-vjeçare me Rapidin. Në sezonin e parë në kryeqytetin Vjenë sulmuesi shkodran shënoi 20 gola. “Unë kam edhe dy vite kontratë me Rapidin dhe mendoj ta respektoj. Të paktën edhe në sezonin e ardhshëm do të jem pjesë e kësaj skuadre,” - përfundon Hamdi Salihi.

Sporti Shqiptar, 2010-06-02