Skela: Hungaria dhe Malta, zhgënjimi i eliminatoreve

Kapiteni “qan” pikët e lëna me Maltën dhe Hungarinë, ndryshe Shqipëria do të ishte pretendente

Kapiteni i kuqezinjve, Ervin Skela, ka bërë më të mirën ndaj danezëve, ndonëse, siç e pranon vetë, nuk është në kondicionin e duhur fizik, pasi akoma nuk ka gjetur skuadër. Pengu i Skelës, sigurisht edhe i futbollistëve të tjerë, janë pikët e lëna me skuadrat më të dobëta të grupit, ndërkohë që me Suedinë, Portugalinë dhe Danimarkën Shqipëria ka marrë pikë.

- Ervin, një ndeshje shumë e mirë e kombëtares sonë. Morëm atë që kërkonim me Danimarkën?

- Ne kërkonim me Danimarkën të merrnim pikë dhe ia arritëm qëllimit. Sidomos në pjesën e dytë kemi luajtur shumë. Në pjesën e parë, duhet ta pranojmë, patëm mangësi në repartin e mbrojtjes dhe në sulm, sepse ishim shumë larg njëri‑tjetrit. Në pjesën e dytë krijuam më shumë situata për të shënuar, pasi ekipi u shty më përpara. Morëm përsipër riskun, sepse ndryshe nuk mund ta arrinim rezultatin që kërkonim. Pas pësimit të golit nuk kishim rrugë tjetër, veçse të tregoheshim më agresivë në fazën sulmuese.

- Gjatë këtyre eliminatoreve Shqipëria u ka marrë nga një pikë skuadrave më të forta të grupit: Portugalisë, Suedisë dhe Danimarkës, por fatkeqësisht ka lënë gjithçka me Hungarinë…?

- Po ta analizojmë me kujdes këtë problem, do të vëmë re që Shqipëria gjithmonë lë pikë me skuadra të nivelit të saj, por edhe me më të dobëta. Kjo na ka ndodhur edhe në kohën kur kishim trajner Brigelin. Nëse nuk do të linim pikë me këto skuadra, sigurisht që do të ishim shumë më lart në renditje, pse jo edhe do të pretendonim. Zhgënjimet e këtyre eliminatoreve janë pa dyshim humbjet me Hungarinë dhe barazimi me Maltën.

‑ Nëse trajneri Kuzhe do të ishte në krye të stolit kuqezi që në fillim të eliminatoreve, si do të pozicionohej kombëtarja jonë në këtë grup?

‑ Tani është shumë e vështirë të flasësh, pasi ndeshjet janë luajtur thuajse të gjitha. Sigurisht, rezultatet e fundit me trajnerin Kuzhe janë një bazë e mirë për të ardhmen. Ne duhet të shikojmë përpara, jo ato që nuk kemi mundur t’i bëjmë. Trajneri Josip Kuzhe ka ide të qarta për futbollin dhe lojën që ne duhet të zhvillojmë. Këto ide ai mundohet të na i përcjellë para çdo ndeshjeje. Nëse vazhdojmë të marrim rezultate pozitive, puna bëhet më e lehtë dhe grupi më i fortë.

‑ Skela, edhe pse akoma nuk ka gjetur skuadër, kanë qenë në formë të mirë, por ka shfaqur disa probleme fizike…?

‑ Kjo është krejt normale, madje këtë e kam theksuar edhe në konferencën për shtyp para ndeshjes, që me Qipron nuk kam zhvilluar asnjë ndeshje tjetër, përveçse jam stërvitur rregullisht. Por ndeshjet zyrtare nuk mund të zëvendësohen thjesht më stërvitje. Ai që luan futboll e kupton shumë mirë ç’do të thotë të mos luash në ndeshje zytare. Megjithatë, jam munduar të jap maksimumin, pavarësisht se nuk ka qenë e lehtë për mua.

‑ Kur do ta shikojmë Skelën me një ekip të ri?

‑ Shpresoj shumë shpejt.


Dallku premton pikë edhe me Suedinë

Mbrojtësi i Vorsklës ka qenë deciziv në rastin e golit të barazimit, por edhe në ndërhyrjet ndaj sulmuesve danezë, duke e shpëtuar disa herë portën e Ujkanit. Pas Danimarkës është drejt Kosovës, ku do të qëndrojë për tri ditë me djalin e tij 1-muajsh, Anuarin. “Në radhë të parë, dua të falënderoj që të gjithë tifozët tanë të mrekullueshëm, që na mbështetën në këtë ndeshje. Ne ishim shumë të përgatitur dhe të karikuar për këtë ndeshje dhe u munduam që t’i zbatojmë të gjitha detyrat që trajneri na kish dhënë. Loja pati dy tablo: në pjesën e parë patëm pak vështirësi, ndërsa krejt e kundërta ndodhi në pjesën e dytë. Loja foli tërësisht për ne dhe duhet të kishim marrë tri pikët. Megjithatë, edhe me pikën e arritur jam i kënaqur. Përderisa kemi rezultate pozitive, kam bindjen e plotë se kjo kombëtare është në rrugën e duhur. Ndeshja me Suedinë është shumë e vështirë, por edhe ndaj tyre ne do të luajmë si me Danimarkën, pse jo, të arrijmë edhe një rezultat pozitiv.

Sporti Shqiptar , 2009-09-11 00:00:00