Duka: Tri pikat e forta te De Biazit

Presidenti i FSHF-se vlereson punen e trajnerit italian: Harmoni në grup, qartësi taktike dhe komunikim profesional

Presidenti i Federatës Shqiptare të Futbollit, Armand Duka, e konsideroi pozitive paraqitjen e Kombëtares kundër Gjeorgjisë, pavarësisht humbjes 2-1.


Bosi i FSHF-së, i cili ishte i pranishëm në stadiumin “Mikheil Meskhi”, por dhe gjatë përgatitjeve treditore në Tbilisi, vlerësoi perfomancën e lojtarëve dhe punën e trajnerit italian Xhani De Biazi.


Duka: “Ndihet një ndryshim në radhët dhe drejtimin e kuqezinjve, por që natyrisht duhet bërë ende shumë punë për të arritur atje ku janë objektivat reale të futbollit shqiptar në ballafaqimin me Kombëtaren”.

Presidenti Duka, i cili pa për herë të parë në aksion trajnerin italian, në ndeshjen debtuese të këtij të fundit me Shqipërinë, zbuloi edhe disa nga armët më të forta të De Biazit, i dhjeti trajner i huaj që drejton Kombëtaren, pas serbit Ljubisha Broçiç, rusëve Boris Apuhtin dhe Nikolaji Lukshnikov, hungarezit Miklosh Vadash, italianit Xhuzepe Dosena, gjermanit Hans Petër Brigel, holandezit Ari Han dhe kroatëve Oto Bariç dhe Josip Kuzhe.

Duka: “Për trajnerin De Biazi vlerësimi në tërësi, qysh me grumbullimin e deri tek mbarimi i ndeshjes është pozitiv dhe me shpresën e optimizmin e një të ardhme më të mire. Harmonia, krijimi i grupit, qartësia në pjesën tekniko-taktike dhe komunikimi profesional mbeten armët më të forta të De Biazit”.

Njeriu që ka dhe të drejtën ekskluzive për përzgjedhjen e trajnerit të Kombëtares – ka zgjedhur gjashtë të tillë nga viti 2002 kur erdhi në krye të Federatës, tha se ishte i kënaqur tërësisht për pjesën e parë, duke veçuar dëshirën dhe organizimin e skuadrës, ndërkohë që u tregua kritik me lojën e pjesës së dytë.




Sipas Dukës, mangësitë erdhën si rezultat i eksperiencës tek disa futbollistë, ku të paktën tre prej tyre bënë debutimin me fanellën kuqezi: Edgar Çani (autori i golit të vetëm të Shqipërisë), Hair Zeqiri dhe Armando Sadiku (këta dy të fundit si zëvendësues).

Duka: “Performanca e parë është pozitive gjithnjë duke i lënë të hapura ritmet e mëdha të punës dhe përgjegjësitë që janë përpara tyre për të ardhmen".

Ndeshja e ardhshme miqësore e Shqipërisë, është ajo me Spanjën, kampione e botës dhe Europës, e programuar për më 30 maj 2012, në Zyrih të Zvicrës.

albania-sport , 2012-03-02 09:58:18