Ujkani: Ja si i prita penalltite

Gardiani i Kombëtares shqiptare ishte heroi i ndeshjes në humbjen 2-1 me Gjeorgjinë

Samir Ujkani ishte protagonisti absolut i Kombëtares, në humbjen 2-1 në miqësoren me Gjeorgjinë, me portierin e Novarës që priti dy penallti, nga një në çdo pjesë loje.

I vlerësuar si një nga portierët e talentuar të Serisë A, madje i përfshirë edhe në një listë të veçantë për portierët që kanë pritur këtë sezon penallti në kampionatin italian, Ujkani dëshmoi pjekuri në Tbilisi.

Ujkani: “Jam shumë i kënaqur me lojën tonë. Sidomos në pjesën e parë ishim super. Në 20 minutat e para të pjesës së dytë vuajtëm presionin e Gjeorgjisë, e cila ushtroi presing të madh. Në këtë moment pësuam edhe golin e parë. Goli i dytë i gjeorgjianëve ishte i parregullt, sepse në momentin kur e goditi topin lojtari vendës, e preku fillimisht me dorë. Prandaj protestova edhe tek gjyqtari, por ai vendosi të vazhdonte lojën”.

Është interesant fakti, që 23-vjeçari Ujkani, i cili luan në Itali nga viti 2007, ka bërë debutimin e tij dy vjet më parë, pikërisht në ndeshjen Shqipëri-Gjeorgji, më 10 qershor 2009, në atë barazim 1-1.

Ujkani: “Me De Biazin trajner do të përfitojmë shumë në aspektin taktik. Falë punës së tij do të përmirësohemi edhe më, duke u rritur nga ndeshja në ndeshje”.


Në kampionatin italian, Ujkani ka pritur dy penallti, e fundit është ajo e Kandrevës së Cezenës, në humbjen 3-1 të Novarës.



Ujkani: “Personalisht, jam i kënaqur që prita dy penallti, edhe pse nuk e evitova dot humbjen. Po punoj shumë te Novara, ndërsa po mundohem të përparoj edhe me kombëtaren. Në të shkuarën kam bërë ndonjë gabim, por më duhet të fitoj edhe pak eksperience”.



Samir Ujkani ka zhvilluar 14 ndeshje me Kombëtaren e Shqipërisë.

albania-sport , 2012-03-02 09:49:51