De Biazi: Humbem per faj te arbitrit

Trajneri i Kombëtares: Tani e njoh më mirë skuadrën. Edgar Çani bëri një ndeshje shumë të mirë

rajneri i Shqipërisë, Xhani De Biazi, akuzoi gjyqtarin moldav Sidenko, se kishte ndikuar indirekt në humbjen 2-1 të Shqipërsë në Gjeorgji.

Arbitri dha dy penallti të dyshimta, një një në çdo pjesë loje, por që u pritën nga Samir Ujkani, pavarësisht se në topin e rikthyer në 11-shin e dytë, gjeorgjianët shënuan golin e fitores.

De Biazi: “Nga kjo ndeshje të mbetet shija e keqe e rezultatit, por dua të them se këtu pati ndikimin e tij edhe arbitri, vendimet e të cilit ishin të dyshimta. Madje, edhe falë tij, ne e humbën këtë ndeshje”.

Shqipëria shënoi gol me anë të Edgar Çanit në minutën e 3-të, duke rrezikuar disa herë në fraksionin e parë të ndeshjes.

Trajneri: “Në pjesën e parë lojtarët i zbatuan me përpikëri detyrat që u kisha ngarkuar, funksionuam mjaft mirë të organizuar si skuadër, ndërsa në të dytën vuajtëm disi, sidomos në 20 minutat e para”.

Kjo ishte ndeshja e parë e De Biazit në bankinën e Shqipërisë, një takim më shumë njohës i kontigjentit të Kombëtares.

De Biazi: “Për mua ka pak rëndësi rezultati në këtë ndeshje, por ajo çka dua të evidentoj për mirë është karakteri që treguam në pjesën e parë, ndërsa si defekt, që duhet rregulluar, menaxhimi i rezultatit, kur jemi në epërsi. Rëndësi ka fakti që tashmë e njoh edhe më shumë skuadrën, kam pikasur problemet, me të cilat do të merremi hap pas hapi, që t’i minimizojmë sa më shumë të jetë e mundur”

Kundër Gjeorgjisë debutuan tre lojtarë të rinj: dy sulmuesit Çani dhe Sadiku, si dhe mesfushori Zeqiri.

Tekniku: “Edgar Çani bëri një ndeshje shumë të mirë, edhe pse në debutim. Ai e nisi me gol përfaqësimin me Shqipërinë, madje shënoi shumë shpejt, duke na ndihmuar të rriteshim psikologjikisht. Edhe debutuesit e tjerë, për aq minuta sa patën në dispozicion, u munduan ta justifikojnë veten”.


Gjeorgji – Shqipëri 2-1
Golat: Kobakhidze 48’, Amisulashvili 86’ / Çani 3′
Gjeorgjia: Revishvili, Khizanishvili, Amisulashvili, Kashia, Grigalava, Duashvili (Gelashvili 46’), Ananidze (Kenia 75’), Kvirkvelia, Kobakhidze (Targamadze 46’), Kankava, Dvalishvili (Martsvaladze 57’). Trajner: T.Ketsbaia
Shqipëria: Ujkani (Shehi 87’), Lila, Dallku, Veliu (T.Osmani 87’), Agolli, Bulku (Bakaj 76’), Roshi, Vila, Hyka (Zeqiri 55’), Muzaka (G.Lika 87’), Çani (Sadiku 82’). Trajner: De Biazi
Gjyqtarë: G.Sidenko, O.Molchanov, V.Gorbatov (Moldavi)

albania-sport , 2012-02-29 12:06:15