Edgar Cani: Jam i lumtur per golin

Sulmuesi i ri i Kombëtares shënoi në debutimin e tij. Është lojtari i 77-të që shënon një gol me kuqezinjtë

Ndeshja e parë, goli i parë.

Gol pas 150 sekondash lojë. Një debutim ëndrrash për Edgar Çanin me fanellën kuqezi.

Kombëtarja duket se ka gjetur bomberin e ri.


Ish-kapiteni i Kombëtares shqiptare, Igli Tare, ia kishte rekomanduar zyrtarëve të Federatës Shqiptare të Futbollit, por zyrtarët e ftohtë nuk e kishin marrë në konsidertatë sulmuesin e ri gjigant.

Me një hipotekë prej 9 gola në kampionatin polak (me Polonia Varshavën) dhe një formim prej lojtari profesionist me gjashtë skuadra italiane: Peskara, Palermo, Askoli, Padova, Piacenca dhe Modena, Çani e fitoi thirrjen e parë në Kombëtare, pikërisht nga një trajner italian, Xhani De Biazi, kur kroati Josip Kuzhe nuk e kishte marrë kurrë në konsideratë.

Çani: “Jam shumë i kënaqur për golin dhe debutimin që bëra me Kombëtaren e Shqipërisë. Luajtëm një ndeshje me dy tablo. Një pjesë të parë shumë të mirë, ndërsa në të dytën e nisëm keq, shumë të ndrojtur, ndaj edhe pësuam golin e barazimit shumë shpejt”.

Goli i Çanit ishte i pari i realizuar në tokën gjeorgjiane, pasi në Tbilisi, Shqipëria nuk kishte shënuar në asnjë prej kater ndeshjeve të mëparshme.

Sulmuesi gjigant (192 cm) tregoi dhe emocionet e ndeshjes së parë të tij: “Në fakt, kisha shumë emocione që para se të niste loja, duke qenë se kisha debutimin tim me Shqipërinë. Por, fatmirësisht, gjithçka shkoi mirë, sepse shënova gol që në minutën e tretë. Kjo më ndihmoi ta përballoja presionin e ndeshjes së parë me kombëtaren.”


Edgar Çani shkroi emrin e tij në librin e artë të golashënuesve të Shqipërisë, në një ndeshje ndërkombëtare. Edgari është lojtari i 40-të që ka shënuar një gol, ndërkohë që numri i atyre që kanë ralizuar me Kombëtaren shkon në 77. Rekordin absolut përsa i përket golave të shënuar me fanellën kuqezezë e mban Erjon Bogdani: 15 gola.

Sulmuesi i ri, i konsideruar si pasuesi i Erjon Bogdanit në Kombëtaren shqiptare, e sheh me optimizëm këtë Kombëtare. “Ishte një ndeshje miqësore, nuk kemi pse hidhërohemi nga humbja. Duhet të nxjerrim mësimet e duhura dhe të shohim përpara. Gjithsesi, duhet të vazhdojmë të punojmë dhe të rritemi ndeshje pas ndeshjeje”.

Në Tbilisi, Edgar Çani shënoi golin e vetëm të Kombëtares, duke e çuar në dhjetë numrin e tyre të realizuar në 12 ndeshje kundër Gjeorgjisë, e duke u bashkuar me Igli Taren (3 gola), Ervin Skelën (1), Alban Bushin (1), Altin Rrakllin (1), Bledar Kolën (1), Besnik Hasin (1) dhe Ansi Agollin (1).

albania-sport , 2012-02-29 12:04:51