Cana: Nuk mund të luajmë me dy sulmuesë!

Kapiteni i ri i përfaqësueses, Lorik Cana mendon se ekipi kombëtar i Shqipërisë e ka të vështirë të luajë me dy sulmuesë në fushë. “Realisht e kemi shumë të vështirë të përballojmë dy sulmuesë në fushë. Jemi Shqipëria dhe nëse luajmë me dy futbollistë përpara, e kemi të vështirë të përballojmë në mesfushë dhe të prodhojmë lojë”, tha mesfushori kuqezi. Lojtari i Lacios u rikthye në mesfushë pas një mungese të gjatë në këtë repart, duke qenë se ka luajtur vitet e fundit në mbrojtje. “Nuk dua të krahasohem me emra të mëdhenj si Zaneti i Interit që luan në shumë pozicione. Unë e shoh veten të tillë, të vlefshëm aty ku ka nevojë skuadra”, tha Cana. Ndërsa për lojën e ekipit: “Normalisht që edhe shkallët bosh të stadiumit ndikuan pak. Shpresoj që tifozët të kthehen në ndeshjet e ardhshme. Sa i përket fushës, mendoj se luajtëm keq në pjesën e parë dhe u përmirësuam ndjeshëm në të dytën. Mendoj që ishim pak të pafat në fushë"

Salihi: E nisëm keq, tifozët duhet të na mbështesin!

Sulmuesi i Shqipërisë, Hamdi Salihi mendon se përfaqësuesja kuqezi e nisi shumë keq ndeshjen, si në fushë ashtu edhe në tribuna. “E vështirë të luash në ato shkallë bosh. Kjo ndikoi edhe në atë nisje të dobët që i bëmë ndeshjes. Kundërshtari arriti të na shënonte dhe megjithë përpjekjet tona për të bërë diçka të mirë në pjesën e dytë nuk mundëm të ndryshonim rrjedhën e lojës. Ishte një ndeshje në të cilën duhet të kishim bërë më shumë, por fatkeqësisht nuk shkuam më tej”, fjalët e sulmuesit.

Salihi flet me nota kritike edhe për tifozët: “Sinqerisht që prisja më shumë prej tyre. Ne kemi dhënë përherë shpirtin në fushë, kurrë nuk kemi luajtur keq përballë tyre. Jam pak i zhgënjyer në këtë drejtim”.

Vila: Jam “OK” me atë që vendos trajneri!

Mesfushori i ekipit kombëtar, Emiljano Vila ishte në fushë dje për herë të parë pas një kohe të gjatë vuajtjesh që kishin kulmuar me mosgrumbullimin në dy ndeshjet e fundit eliminatore. “U ndjeva mirë në fushë. Po shkoj drejt formës sime më të mirë, duke qenë se në ndeshjet e fundit edhe me Janinën kam luajtur si titullar dhe për 90 minuta. Mendoj që në pjesën e dytë, ku luajta edhe unë dominuam dhe duhet të kishim shënuar. Në fushë kishte shumë të rinj njëkohësisht kështuqë është pak e vështirë, megjithatë kjo skuadër premton për të ardhmen”, mbylli Vila.

Sport Expres , 2011-11-13 12:40:02