Flet Bogdani: Fanella e kombëtares nuk dhurohet, ajo duhet merituar

Skuadrat pretendente punojnë mirë me brezat. Në Shqipëri nuk ndodh kjo gjë me të rinjtë

Për sulmuesin e kombëtares shqiptare Erjon Bogdani miqësorja e 10 gushtit, që do të luhet ndaj Malit të Zi në “Loro Boriçi” të Shkodrës, është e gjitha në funksion të përballjes së 2 shtatorit me Francën.

Pra, për 34-vjeçarin duhet mirëkuptuar edhe lista e shpallur nga trajneri Kuzhe për këtë miqësore, pasi ky takim me malazezët do të pasqyrojë Shqipërinë për dy sfdat e eliminatoreve të Euro 2012-ës, së pari me Francën dhe pastaj me Luksemburgun.

“Kjo miqësore me Malin e Zi është një sfidë që i përgjigjet ndeshjeve të ardhshme në grupi për eliminatoret e europianit. Trajneri për këtë sfidë ka marrë ata lojtarë që do të grumbullojë për dy ndeshjet e ardhshme me Francën dhe Luksemburgun.

Realisht kjo ndeshje pasqyron Shqipërinë që do të luajë kundër Francës pas dy javësh. Është miqësore, por ne do të impenjohemi për të marrë një rezultat më se pozitiv për ta fituar ndeshjen,”- u shpreh së pari në konferencën për shtyp Erjon Bogdani.

Të përsëritim 25majin e 2010-ës – Për Erjon Bogdanin, synimi kryesor i kuqezinjve mbetet ndeshja me Francën për eliminatoret e EURO 2012-ës, por ekipi ka mundësitë që të fitojnë sërish ndaj malazezëve.

Më 25 maj 2010 Shqipëria, falë golit të Hamdi Salihit, fitoi miqësoren me Malin e Zi, takim i zhvilluar në Podgoricë, kështu që mundësitë janë sërish. “Mund të them se kemi mundësi për të përsëritur ndeshjen miqësore të vitit të kaluar.

Por Mali i Zi ka një ekip shumë të mirë, gjë të cilën e tregon edhe ecuria e tyre në eliminatoret e europianit, pasi janë pas Anglisë. Gjithsesi, jemi të bindur se do të luajmë mire, edhe pse qëllimi ynë është sfida me Francën. Nëse luajmë mirë në Shkodër, kemi bërë një hap në përgatitjet tona në sfidën me “gjelat,”- vijon më tej sulmuesi kuqezi, Erjon Bogdani.

Puna me brezat e rinj – Nga ajo që ka pohuar dje veterani i kombëtares sonë del se shkak për vonesën e rinovimit të kuqezinjve mbetet puna jo e mirë e bërë me brezat e rinj.

“Mali i Zi, apo çdo skuadër tjetër pretendente në këto eliminatore, ka punuar mirë me brezat. Në ekipet kombtare vijnë lojtarë të formuar me skuadrat e tyre, gjë e cila i mungon Shqipërisë.

Për ta arritur një gjë të tillë duhet punuar shumë me brezin e ri, për të ardhur më pas tek Shpresa dhe tek ekipi kombëtar. Ekipi kombëtar nuk dhurohet, ai duhet merituar. Kjo do të thotë që të rinjtë të luajnë mirë me ekipet e tyre si brenda dhe jashtë vendit dhe më pas të vijnë në kombëtare.

Pa shpresa kualifikimi – “Humbja me Bosnjën sikur na i preu shpresat e kualifikimit. Ne zhvilluam një ndeshje shumë të mirë me Bjellorusinë dhe shpresonim të merrnim diçka në Bosnjë. Kjo nuk ndodhi, kështu nuk ke çfarë t’i bësh.

Çdo ndeshje ka historinë e vet, Bosnja është lënë pas dhe përgatitemi për dy ndeshjet e radhës me Malin e Zi dhe Francën. Me këtë skuadër të gjithë do të mundohen të japin maksimumin. Para publikut tonë ekipi luan shumë mirë, ashtu siç do të mundohet të bëjë edhe në këto dy ndeshje.”

Objektivi, 14 pikë – “Objektivi i kombëtares ka qenë që në çdo ndeshje të japë maksimumin. Personalisht shpresoj se këto eliminatore do t’i mbyllim me një rekord pikësh dhe më pas të shohim ku do të jemi. Pararësisht se luajmë me Francën dhe Luksemburgun, të marrim katër pikë dhe më pas të shohim dy ndeshjet e tjera sërish me Francën e Rumaninë në Shqipëri. Jam i bindur se do të marrim 14 pikë,”- përfundon sulmuesi i kombëtares shqiptare, Erjon Bogdani.



Botërori 2014. “Të fitojmë brenda, të heqim ndrojtjen jashtë”



Për Erjon Bogdanin, grupi ku bën pjesë Shqipëria për Botërorin e 2014-ës nuk është i lehtë, por shanset për kuqezinjtë janë më të mëdha se kurrë. Sipas Bogdanit, nëse luhet si me Bjellorusinë në Shqipëri, kuqezinjtë mund të jenë pretendentë realë.

“Sa për eliminatoret e ardhshme, gjithçka mund të ndodhë. Me Slloveninë kemi humbur një miqësore që mund ta kishim fituar, barazuar, ose humbur, siç ndodhi në të vërtetë. Ne luajtëm mirë, por fati nuk ishte me ne. Sa për eliminatoret dhe skuadrat që na kanë rënë, të paktën duhet të marrim tri pikët në Tiranë. Në fushën tonë kemi luajtur dhe skuadra të forta dhe kemi bërë ndeshje të mëdha.

Por ne duhet të përmirësohemi në një pikë tjetër. Ne duhet të përmirësohemi në ndeshjet jashtë. Unë nuk kam frikë të luaj në Shqipëri, sepse jemi të hapur. Problemi mbetet kur luajmë jashtë, sepse jemi të ndrojtur. Prandaj, nëse e heqin ndrojtjen, mund të marrim rezultate. Grupi ku ndodhet Shqipëria për eliminatoret e Botërorit “Brazil 2014” nuk është i lehtë.

Praktika ka treguar se kur luajmë me skuadra që janë pak më lart se ne, gjithmonë kemi pasur vështirësi. Por nëse si me Bjellorusinë në Shqipërinë, me çdo ekip mund të marrim rezultat dhe të pretendojmë,”- u shpreh Erjon Bogdani rreth fatit të Shqipërisë në eliminatoret e Botërorit 2014.

Çezena - Gjatë kësaj merkatoje verore të konsiderueshme kanë qenë ofertat për Erjon Bogdanin, i cili edhe për një sezon është nënkontratë me klubin romanjol. Bogdani ndihet i lumtur te Çezena dhe mund ta lërë vetëm po pati një ofertë më të mirë.

“Në planin personal ende nuk jam në formën optimale, sepse me Çezenën kemi edhe një javë fazë përgatitore. Megjithatë, jam stërvitur mirë, kemi luajtur shumë miqësore dhe forma ime vazhdon në rritje. Me Francën do të jem edhe më mirë.

Kam një kontratë shumë të mirë me Çezenën, e cila vijon edhe për një vit. Kam folur me trajnerin dhe presidentin për shkak të raporteve të mira. Ndonëse trajneri ka ide që të luajë më tre sulmues të lëvizshëm, unë jam i mirëpritur.

Por, nëse gjej një ekip që më kënaq nga ana financiare dhe sportive, mund të largohem. Në të kundërt, do të mbetem te Çezena, pasi edhe tifozët më duan. Për më tepër që kampionati italian është i gjatë dhe shumë i vështirë. Një pjesë loje apo gjysmë pjese mund ta luaj shumë mirë. Jam i bindur që kam për të dhënë shumë ende në Serinë A.”



58

Ndeshje ka zhvilluar me kombëtaren kuqezi Erion Bogdani, që nga debutimi i vitit 1999 e deri më tani, me të cilën ka realizuar 13 gola.
Kukaj i Realit zgjedh Shqipërinë para Spanjës

Sulmuesi kosovar i grup-moshave të reja të skuadrës spanjolle, Real Madrid, Arlind Kukaj, ka vendosur përfundimisht të veshë fanellën e kombëtares së Shqipërisë. Lajmin e ka konfirmuar vetë lojtari për mediat kosovare.

17-vjeçari nga Prishtina thotë se ka pasur biseda me drejtuesit e Federatës Shqiptare të Futbollit dhe disa nga prijësit e Tifozëve KuqeZi, të cilët e kanë bindur atë të zgjedhë Shqipërinë para kombëtares spanjolle.

“Kam pasur biseda të shumta me zyrtarë të FSHF-së dhe me Tifozët KuqeZi. Këta të fundit kanë këmbëngulur që unë të luaj vetëm për Shqipërinë. Ata më kanë folur shumë për shqiptarët e tjerë, të cilët nuk kanë pranuar të luajnë për Shqipërinë dhe trajtimin që kanë ndaj tyre. Për këtë dhe disa çështje tjera, unë kam vendosur të luaj për Shqipërinë,” – deklaron Kukaj.

Lojtari ka një marrëveshje me ekipin argjentinas, Boka Juniors, që të kalojë atje vitin e ardhshëm. Kukaj gjatë këtyre ditëve ishte në Argjentinë, ku zhvilloi disa ndeshje kontrolli me grup-moshat e reja të këtij ekipi dhe paraqitjet e mira të tij bënë që ai të ftohet edhe për një ndeshje me ekipin e parë.

ILIR CARA , 2011-08-10 09:13:23