Skela i rinuar: S’luajta me Arkën për kombëtaren

Nuk luajta ndeshjet e fundit në Poloni, por u ruajta për kombëtaren. Mezi e prisja këtë ndeshje

Një situatë që përsëritet. Shumë muaj pa luajtur, por gjithmonë i gatshëm për kombëtaren. Ndoshta bluza kuqezi e ka bindur që të mos heqë dore para kohe nga futbolli i luajtur. Ervin Skela, siç e pohon vetë, mezi e ka pritur këtë ndeshje.

Gjendja fizike: Skela zbulon “hilenë” që u ka bërë polakëve të Arkas. Mund të luante në ndeshjet e fundit, por është ruajtur për kombëtaren: “U shumë kohë pa luajtur, por unë ndihem mirë fizikisht. Jam përgatitur vetëm për këtë ndeshje.

Kam pasur probleme me gjurin dhe jam kuruar në Gjermani për të qenë në formë për këtë sfidë, sepse është një nga ndeshjet më të rëndësishme si për mua ashtu dhe për çunat. Të them të drejtën, mund të luaja tek Arka tani në fund, por u ruajta veçanërisht për kombëtaren, sepse mezi e prisja këtë ndeshje.”

Humbja e Bosnjës: “Bosnja ka shumë cilësi në fazën sulmuese, por mangësi në mbrojtje. Ishte një meritë e rumunëve që nxorën në pah problemet e Bosnjës. Edhe në duhet të bëjmë atë që bëri Rumania. Idetë e trajnerit i kemi të qarta dhe e dimë se çfarë duhet të bëjmë në fushë. Nëse luajmë me shpirt gare dhe në grup, atëherë jemi në rrugën e duhur. Ai që i shmanget kësaj rruge, nuk ka vend në ekipin kombëtar.”

Ndryshe nga Bjellorusia: “Sa i përket lojës sulmuese, ne e pasqyruam kundër Bjellorusisë. Por janë dy ndeshje të ndryshme. Do të na duhet që të jemi të kujdesshëm në mbrojtje, jo vetëm mbrojtja, pasi ata kanë shumë cilësi para me Dzekon, Mismoviçin, Ibisheviçin etj. Janë lojtarë që e nxjerrin golin nga hiçi.”

Dy ndeshje të mira: “Këtë herë duhet t’ua mbushim mendjen të gjithëve se ne dimë të bëjmë dy ndeshje rresht të mira dhe të marrim rezultate pozitive. Janë momente që në futboll, që kur fiton bëhesh shumë euforik dhe kur humbet, morali bie. Ne duhet të qëndrojmë me këmbë në tokë dhe këtë ta tregojmë me Bosnjën.

Salihi, më i rëndësishmi: “Kur u dëmtua Salihi, patëm të gjithë një shqetësim të jashtëzakonshëm. Të gjithë janë të rëndësishëm, por ai është më i rëndësishmi. Ishim dy ditë në dilemë dhe në stërvitjen e sotme (dje) ishim shumë të angazhuar dhe Salihi ishte aty, me ne, në formë të mirë, ndaj do të jetë kundër Bosnjës.
Do ta vë në dispozicion eksperiencën time për lojtarët e rinj për të ruajtur unitetin e grupit.

Adi Metaliu , 2011-06-06 04:35:08