Dallku: Nuk kemi frikë nga Bosnja, as nga Argjentina

Flet mbrojtësi i përfaqësueses së Shqipërisë dhe Vorskla Polltavës, Armend Dallku

40 ndeshje ka zhvilluar Armend Dallku me bluzën kuqezi qysh nga viti 2009

1 gol ka shënuar Dallku me Shqipërinë, në fitoren 3-0 me Maltën

Mbrojtësi i Vorsklës në kampionatin ukrainas, Armend Dallku, është i bindur se Shqipëria do të arrijë rezultat pozitiv ndaj Bosnjë-Hercegovinës në ndeshjen eliminatore për “Euro 2012″. Ai pohon në një intervistë për gazetën kosovare “Sport” se Shqipëria do të luajë për fitore në këtë takim, ndërkohë që edhe nëse ndeshja del barazim, shqiptarët duhet të ndihen krenarë.

Dallku jep mendimin e tij edhe për miqësoren e luksit me Argjentinën, duke thënë se kuqezinjtë nuk do të keni frikë para Argjentinës së Lionel Mesit.

- Armend, në ndeshjen e fundit barazuat me Shakhtarin (1-1). A jeni i kënaqur me formën tuaj?

Sigurisht që jam shumë i kënaqur si me formën time ashtu dhe të skuadrës. Kohët e fundit jam vlerësuar edhe nga mediat ukrainase, pasi në dy ndeshje jam përzgjedhur në 11 shën e javës. Këtë kampionat kam pasur edhe pak fat, pasi nuk kam pësuar asnjë dëmtim, Jam aktivizuar në të gjitha ndeshjet.

Kam shënuar vetëm dy gola e ndoshta mund të kisha shënuar më shumë, mirëpo pozicioni im në fushë nuk me jep shumë mundësi të jem pranë portës kundërshtare. Unë luaj aty ku ka nevojë trajneri. Ndonjëherë, aktivizohem si qendërmbrojtës e shpesh luaj edhe si mbrojtës i djathtë.

- Deri në fund të kampionatit ka mbetur për t’u luajtur edhe një javë. Si i vlerësoni rezultatet e Vorsklës në këtë edicion?

- Në tërësi, jam i kënaqur me rezultatet e arritura këtë sezon. Ne kemi një skuadër të re dhe kemi synuar një nga shtatë vendet e para në renditje, ndërkohë që vendin e gjashtë e kemi siguruar.

- Ditë më parë ju dhe sulmuesi tjetër kosovar i Vorsklës, Ahmed Januzi, keni rinovuar kontratat me Vorsklën. A do të thotë kjo që keni vendosur të përfundoni karrierën në Ukrainë?

Unë dhe Ahmedi jemi familjarizuar me këtë klub dhe me këtë qytet. Këtu kam gjetur rehatinë shpirtërore. Në qytetin e Polltavës jetoj së bashku me gruan dhe fëmijët e mi, të cilët gjithashtu janë shumë të lumtur.

Tashmë po bëhet një kohë e gjatë që jetojmë këtu dhe e kam të vështirë të largohem. Vetëm nëse më vjen ndonjë ofertë shumë shumë e mirë nga ana financiare do të largohesha nga qyteti i Polltavës.

- Më 7 qershor Shqipëria përballet me Bosnjë-Hercegovinën. A ka gjasa Shqipëria të dalë me një rezultat pozitiv nga kjo ndeshje?

- Së pari, dëshiroj të them se jam jashtëzakonisht i kënaqur që rikthehem në kombëtare, pasi mungova një ndeshje për shkak të kartonëve. Eshtë shumë i rëndësishëm fakti që Shqipëria nuk i frikësohet asnjë kundërshtari. Ne do të luajmë pa kurrfarë presioni dhe frike ndaj Bosnjës.

Edhe boshnjakët tashmë e dinë forcën tonë. Ata në takimin e parë në Tiranë (1-1) na kishin nënvlerësuar para ndeshjes, ndërsa më pas janë bërë pishman. Ne do të luajmë për fitore në “Zenica”, mirëpo edhe barazimi nuk do të ishte rezultat i keq. E njohim mirë Bosnjën. Dihet se ata kanë formuar një përfaqësuese shumë të fortë.

- Sa shanse ka Shqipëria për t’u kualifikuar në Europian?

- Është mirë që për çështjen e kualifikimit të flasim pas takimit me Bosnjën. Gjithçka do të varet nga ai takim. Mund të them se është ndër sfidat më të rëndësishme të kësaj fushate eliminatore.

“Privilegj të sfidosh Lionel Mesin”

Tashmë është konfirmuar miqësorja me Argjentinën, e cila do të zhvillohet më 20 qershor. Por si e vlerëson Dallku këtë takim? “Eshtë privilegj për çdo futbollist të luajë ndaj Argjentinës, e cila është ndër kombëtaret më të forta në botë. Unë gjithnjë kam besuar se FSHF ja ndonjë ditë do të organizonte ndonjë miqësore të tillë.

Të sfidosh futbollistë si Lionel Mesi do të thotë shumë për mua. Besoj se unë dhe futbollistët e tjerë të kombëtares nuk do të frikësohemi para argjentinasve, përkundrazi, do t’u tregojmë se edhe shqiptarët dinë të luajnë futboll.”

Januzi nuk ftohet nga Kuzhe

Armend Dallku, i cili mungoi në ndeshjen e fundit të eliminatoreve ndaj Bjellorusisë, për shkak të kartonëve (fitoi Shqipëria 1-0), për takimin me Bosnjën, ka marrë ftesën nga FSHF ja. Ndërkohë, sulmuesi tjetër kosovar i Vorsklës nuk është ftuar nga përzgjedhësi Josip Kuzhe për këtë përballje. Kroati vazhdon t’i besojë vetëm dyshes Salihi-Bogdani.

Shqipëria ruan vendin e 50 të në renditjen e FIFA-s

Dje, institucioni ndërkombëtar i futbollit, FIFA, ka bërë publike renditjen e përgjithshme të përfaqësueseve për muajin maj. Shqipëria edhe për këtë muaj renditet e 50-ta, duke ruajtur pozicionin e fituar një muaj më parë. Përfaqësuesja kuqezi kurrë më parë nuk ka pasur një pozicion më të mirë se vendi i 50-të.

Rekordi i mëparshëm daton vetëm pak muaj më parë, por që u thye sërish pas fitores me Bjellorusinë në fund të marsit. Nëse Shqipëria fiton me Bosnjën, pa dyshim që do ta thyejë sërish këtë rekord.

Bogdani largohet nga Çezena?

Gazeta italiane “Corriere dello Sport” u kushton hapësirë të konsiderueshme ndryshimeve që mund të ndodhin te Çezena vitin e ardhshëm në Serinë A. Sipas kësaj gazete, shumë futbollistë do të largohen nga klubi, duke përfshirë këtu edhe sulmuesin shqiptar, Erjon Bogdani.

Ndonëse ka shënuar shtatë gola për Çezenën dhe secilin më të vlefshëm se tjetri, duket se drejtuesit e kësaj skuadre kanë plane të tjera. Mirëpo në një intervistë të pak ditëve më parë për “Sportin shqiptar”, Bogdani është shprehur se jo vetëm që do të qëndrojë te Çezena, por do të kërkojë kontratë dyvjeçare.

Sporti Shqiptar , 2011-05-24 11:08:11