Shtange: Me fat që pësuam vetëm një gol

Trajneri gjerman i Bjellorusisë, Bernd Shtange, pranon humbjen në “Qemal Stafa”

Ka parë një natë tmerri në “Qemal Stafa” trajneri Bernd Shtange kur “luanët kuqezinjë” kanë dominuar të gjithë sfidën. Tepër realist dhe aspak i nervozuar, me qendrimin e tij përpara mediave, tekniku gjerman duket sikur u shtrëngon duart të gjithë shqiptarëve, duke u pajtuar me humbjen. Edhe pse ai nënvizon edhe një herë se në përfaqësuesen e “rusëve të bardhë” mungonin rreth 7-8 lojtarë titullarë. Por nëse kishte një armë të fortë në radhët e Bjellorusë ai ishte portieri Veremko, të cilin Shtange e vlerëson në maksimum edhe pse është portieri i dytë në përfaqësuesen e tij. “Shqipëria e meritoi fitoren sot, sepse ishte skuadra më e mirë në fushë dhe krijojë më shuëm raste për shënim. Kur bën shumë gabime si këto të ekipit tonë në “Qemal Stafa”, në të tilla nivele, nuk mund të shënosh apo fitosh një ndeshje. Kjo është arsyeja e parë e humbjes. E dyta është që një vend i vogël si Bjellorusia nuk mund të pretendoi të ketë një skuadër kompetitive nëse i mungojnë 7-8 titullarë. Kjo nuk është fytyra e vërtetë e skuadrës sonë. Nuk pretendonim që të rinjtë që kishim në dispozicion të na zëvendësonin peshën e mungesave që kishim sot (dje), eliminatoret tona fillojnë pas Tiranës. Që nga minuta e parë ishte shumë e vështirë për ne, sepse Shqipëria luajti me entuziazëm. Për ju ishte ndeshja e fundit dhe nesë humbisnit sot u thonit “lamtumirë” eliminatoreve. Do të ishte mbyllur festa juaj, por jeni sërish në lojë. Ne donim patjetër 1 pikë përpara tri sfidave që do të luajmë në fushën tonë ndaj Francës, Luksemburgut dhe Bosnjës. Nuk mund ta krahasoj Shqipërinë me Bjellorusinë në harkun e dy sfidave, sepse ne fituam në fushën tonë dhe ju këtu, por ky i sotmi (i djeshëm) nuk ishte i vërteti. S’mundëm t’i zëvendësonim titullarët,”- citon Shtange. I cili i pyetur rreth mundësive për kualifikimit të Shqipërisë dhe Bjellorusisë tha: “Në grupin tonë, ashtu si në gjithë grupet e tjera, do të fitojë Franca, sepse Italia, Spanja, Holanda, Anglia, Gjermania, të gjitha “bigët” do të fitojnë grupin e tyre. Ndërkohë që të gjitha skuadrat e tjera do të luftojnë për vendin e dytë. Portieri bëri punë shumë të mirë, edhe pse është i dyti në skuadër, pasi i pari, që është edhe kapiteni ynë mungonte sot. Për mos të thënë që portieri ishte më i miri në fushën e blertë për ne dhe ishte merita e tij që mbetëm në lojë deri në fundin e sfidës. Po të mos ishte ai, do të ishim mundur më thellë. Kishim probleme edhe me Bogdanin, por e gjithë skuadra shqiptare ishte më mirë se ne, por në veçanti sulmuesi i Çezenës na krijoi probleme. Ishim me fat që pësuam vetëm një gol ndaj Shqipërisë.”

Andi Matraxhiu , 2011-03-27 09:53:57