Regjisori Skela: Fitore për gjithë Shqipërinë!

Ervin Skela rikthehet në kombëtare pas 5 muajsh dhe sërish do të luajë kundër Bjellorusisë

Shqipërisë i rikthehet regjisori, ai që i jep fantazi lojës dhe që di ta udhëheqë skuadrën drejt portës kundërshtare. Nuk është në kohët e tij të arta, megjithatë kombëtarja ka sërish nevojë për të.

S’është faji i tij, as i trajnerit Kuzhe, që nuk ka një futbollist të ri që ta zëvendësojë. Ervin Skela do të jetë pjesë e kombëtares të paktën deri në fund të këtyre eliminatoreve, më as gjithçka bëhet edhe më e vështirë.

Në Poloni, prej kombëtares

Nga kategoria e 5-të gjermane, në ligën e parë polake. Një kapërcim i papritur, që e ka një arsye: “Kur më erdhi kjo ofertë, u gëzova shumë. Insistimi i Kuzhes që unë të isha pjesë e kombëtares më detyroi të kërkoja një skuadër profesioniste.

Jam shumë i gëzuar që jam këtu dhe do të jap maksimumin tim që ekipi ta fitojë këtë ndeshje. Çdo lojtar i kombëtares ndihet i lumtur kur luan për vendin e vet. Është privilegj të veshësh fanellën kuqezi. Unë e kam pasur ëndërr këtë që fëmijë. Para shumë vitesh, kam qenë në formë më të mirë, por edhe tani ndihem i motivuar për të dhënë maksimumin.”

Nevoja për Skelën

Shqipëria ka ende nevojë për Skelën, ndonëse vitet bëjnë të tyren. Për fat të keq, nuk kemi një futbollist me karakteristikat e tij: “Ndihem mirë që më vlerësojnë për kontributin tim në gjatë këtyre viteve. Në kombëtare nuk ekzistojnë vetëm emra (Lala, Skela, Cana etj.), sepse ekipi funksionon si grup, duke përfshirë edhe trajnerin, stafin teknik e mjekësor.

Unë mungova ndaj Sllovenisë, por nuk ishte fundi. Vlerësimin për mua dua ta tregoj me profesionalizmin dhe eksperiencën time. Unë kam luajtur në kampionate dhe skuadra të rëndësishme. Do të bëj më të mirën, që të marrim rezultat pozitiv. Për mua dhe për gjithë Shqipërinë kjo është një ndeshje e rëndësishme. Duhet ta vlerësojmë dhe ta fitojmë këtë takim.”

Përjashtohet humbja

Para ndeshje askush nuk e pranon barazimin, por kur je në fushë dhe kupton sa e vështirë është të fitosh, mund të ndryshosh mendje: “S’mund ta them tani që barazimi është humbje për ne. Ne jemi euforikë dhe këtë gjendje na e sjell rezultati pozitiv. Varet se si do të shkojë loja.

Ndaj Danimarkës apo Bosnjës jemi kënaqur me barazimin. Bjellorusia është ekip shumë i vështirë, i fortë, që luan shpejt, në mënyrë kompakte. Pra, duhet të jemi shumë të kujdesshëm. Nëse e kemi mundësinë për fitore, do ta fitojmë, në të kundërt edhe barazimi është i kënaqshëm.”

E ardhmja në përfaqësuese

Dhe sa kohë do të ketë nevojë për Skelën Shqipëria? Këtë s’di ta thotë as ai vetë: “Nuk mund të them se sa kohë do të jem në kombëtare. Di që kjo ndeshje është shumë e rëndësishme për mua dhe për ekipin. Mund të jap siguri vetëm për maksimumin tim ndaj Bjellorusisë, që të realizohen objektivat e skuadrës. Dua të tregoj që jam i vlefshëm për ato minuta që më beson trajneri.”

Pasardhësi i Skelës? Ai që do të derdhë djersë

Kur i bëhet kjo pyetje, e ka të vështirë të përgjigjet. Duket sikur ka një zemërim të brendshëm nga fakti që shpesh përmendet emri i tij për të lënë kombëtaren. “Më është bërë shpesh kjo pyetje dhe unë do t’i përgjigjesha me një pyetje.

A u është bërë paraardhësve të mi, Demollarit apo Bledar Kolës, kjo pyetje? Ç’përgjigje kanë dhënë ata? Skelës s’ia ka dhuruar kush vendin në kombëtare. E ka merituar me djersën e tij. Të gjithë ne që jemi këtu, kemi punuar seriozisht dhe kemi dhënë kontribut.

Të rinjtë kanë kualitet, karakter shumë të mirë gjithashtu, por duhet të punojnë më shumë, të jenë më seriozë. Dhe këtë flamur që kemi duhet ta mbajnë, pasi peshon shumë.”

Adi Metaliu , 2011-03-26 04:02:13