Trajneri nuk rresht se eksperimentuari ne stervitje: tre mbrojtes dhe pese mesfushore?!

Dje në orën 16:00 futbollistët e kombëtares kanë qenë sërish në stadiumin “Niko Dovana” për të realizuar seancën stërvitore të ditës së djeshme. Pas disa ushtrimeve shkrythëse, kuqezinjtë kanë nisur menjëherë përgatitjen taktike. Trajneri Kuzhe I ka mbledhur lojtarët në mes të fushës dhe ka shpërndarë jelekët duke e ndarë grupin me dy skuadra. Nga njëra anë është Ujkani, Lila, Cana, Vangjeli, Agolli, Bulku, Lala, Skela, Salihi dhe Bogdani. Përballë tyre kanë qenë Beqaj, Vrapi, Teli, Beqiri, Lika, Duro, Vila, Muzaka, Hyka dhe Bakaj. Nëse një ditë më parë Kuzhe ka punuar më shumë në mbrojtje dhe në formacionin e titullarëve mungonte Bogdani, dje sulmuesi shtatlartë ka qenë në formacionin e parë. Por, ngaqë skuadra përbëhej nga dhjetë lojtarë, ka munguar një qëndërmbrojtës. Kuzhe ka provuar një mbrojtje me tre mbrojtjës në prapavijë. Ajo cka spikatur në këtë ndeshje ka qenë një gol I Bulkut, falë një goditje nga distanca, e cila ka fituar dhe duartrokitjet e tifozëve që ishin të pranishëm në shkallët e stadiumit. Më pas Kuzhe ka grumbullar sërish lojtarët në mes të fushës duke dhënë udhëzime për lojtarë të vecantë. Ndeshja ka nisur sërish, por titullarët janë shtuar në numër duke plotësuar 11-shen. Në mesfushë është shtuar dhe Duro duke luajtur me një skemë 3-4-1-2 që nuk është cudi që mund të jetë dhe skema që Kushe mund të përdorë nesër në mbrëmje përballë Bjellorusisë. Ndoshta mungesat që kombëtarja ka në mbrojtje mund ta detyrojë trajnerin kroat të realizojë një formacion me një mesfushë më të populluar nesër. Pasi kanë përfundur ndeshjesn, lojtarët janë vendosur në rrjesht duke gjuajtur në portë, e cila mbrohej herë nga Beqaj dhe herë nga portiere tjetër Ujkani. Të vetmit që nuk kanë provuar gjuajtjet në portë ishin Vangjeli, Lala dhe Cana. Lala është takuar me anëtarin e komitetit ekzekutiv në Fshf Lutfi Nuri, që ka ndjekuar me vëmendje seancën e djeshme të kuqzinjve. Kurse Cana dhe Vangjeli kanë preferuar të bëjnë pasime me topin. Me gjuatjet në portë është mbyllur seanca e djeshme, që ka qenë vetëm taktike, ndaj nuk ka zgjatur më shumë se 70 minuta.

Sport Ekspres , 2011-03-25 10:13:51