Bjellorusia, “thikë me dy presa” për Shqipërinë dhe Kuzhen

Kjo fushatë e eliminatoreve mund të konsiderohet e suksesshme vetëm nëse lëmë prapa të paktën dy skuadra

Pak para se të niste konferenca e radhës për shtyp, salla ishte e zënë. Në barin e hotel “Dyrrahut” qëndronte vetëm një pjesë e kuqezinjve, kryesisht ata më të rinjtë. Edhe pse akrepat e orës e kaluan 12:00, sërish asnjë lëvizje. Kamerat dhe gazetarët duhet të qëndronin edhe për disa minuta.

Në 12:10, Josip Kuzhe zbret me hap të lehtë shkallët, sikur të sapo ishte ngritur nga shtrati. Dhe ja ku duken Cana, Bogdani, Lala, Skela… Të gjithë veteranët e përfaqësueses kuqezi, ata që kanë dhënë kontributin për më shumë se një dekadë, sapo kishin përfunduar një mbledhje me trajnerin Kuzhe.

Dje, në analizë, nuk ishte e nevojshme prania e gjithë skuadrës, por vetëm e “senatorëve”, fjala e të cilëve ka shumë peshë në kombëtare.
Shqipëria do të luajë ndeshjen e pestë eliminatore të Euro 2012-ës dhe përballë do të ketë Bjellorusinë.

Kur u hodh shorti i këtyre eliminatoreve, të gjithë shqiptarët kanë menduar se kualifikimi mbetet thuajse i pamundur dhe synimi me real do të ishte që, përveç Luksemburgut, të linim të paktën një skuadër tjetër. Por cilën? Francën sigurisht që jo, por ballkanaset (Rumaninë dhe Bosnjën).

Bjellorusia edhe mund të lihet pas. Por si? Në Minsk, përballë këtij kundërshtari kemi zhvilluar ndeshjen më të dobët dhe, për fat të keq, i kemi komplikuar shumë gjërat. Pavarësisht se për momentin renditemi të tretët, do ta kemi shumë të vështirë t’i ruajmë këto pozita, teksa do të ndeshemi dy herë me Francën dhe nga një herë me Rumaninë dhe Bosnjën.

Shqipëria, para se të mendojë për ndonjë rezultat pozitiv me Francën, Bosnjën e në fund me Rumaninë, duhet të marrë fitoren me Bjellorusinë, për të besuar vërtet në një fund të lumtur (me fund të lumtur nuk nënkuptojmë kualifikimin, por lënia e të paktën dy skuadrave poshtë në renditje).

“Kjo ndeshje vendos fatin e këtyre eliminatoreve për Shqipërinë. Ne do të kërkojmë fitoren dhe nëse e realizojmë, atëherë mund të flasim për objektiva të tjerë,” - është shprehur kroati Josip Kuzhe pak ditë para grumbullimit. Dhe ka shumë të drejtë.

Sepse një fitore e mundshme e ngjit Shqipërinë në kuotën e 8 pikëve, që do të thotë moral i lartë për ndeshjet e radhës. Në të kundërt, gjithçka mund të marrë tatëpjetën. Si në 2007-ën, kur Oto Bariç dha dorëheqjen pikërisht pas dy humbjeve në dy ndeshjet e fundit eliminatore (humbja e parë u shkaktua nga Bjellorusia (2-4), në “Qemal Stafa”).

Pa dyshim që kjo ndeshje do të thotë shumë për të ardhmen e trajnerit, i cili mund të fitojë menjëherë një kontratë të re për eliminatoret e ardhshme. Për këtë arsye, Bjellorusia konsiderohet “thikë me dy presa”, për Shqipërinë (mund të synojë më lart se vendi i katërt, ose të përfundojë e parafundit) dhe për Josip Kuzhen.

Adi Metaliu , 2011-03-24 00:00:00