Forma e Bogdanit dhe Salihit, shpresë për kuqezinjtë

Hamdi Salihi ka shënuar kundër Luksemburgut, ndërsa Erjon Bogdani ende nuk ka realizuar në eliminatoret e Euro 2012

Shqipëria do të synojë të shtunën në mbrëmje ndaj Bjellorusisë të regjistrojë fitoren e dytë në kualifikueset e Euro 2012. Por, arritja ose jo e kësaj fitoreje, varet shume nga forma që do të paraqesin dy sulmuesi kryesorë të ekipit kombëtar, Erjon Bogdani (Cesena, Seria A) dhe Hamdi Salihi (Rapid Vien, Bundesliga).

Fitorja e vetme e Shqipërisë në këtë fushatë, është ajo kundër Luksemburgut modest, me rezultatin minimal 1-0: pikërisht Hamdi Salihi shënoi në atë takim golin e vetëm dhe të gjashtin personal me fanellën e kombëtares. 33 vjeçari Erjon Bogdani është aktivizuar ne 3 ndeshje, 57 minuta ndaj Rumanisë, barazim1-1, 90 minuta ndaj Luksemburgut 1-0 dhe 45 minuta ndaj Bosnje-Hercegovinës barazim 1-1 , duke u aktivizuar 193 minuta gjithsej, por pa mundur të shënojë gol. Nga ana tjetër, 27-vjeçari Hamdi Salihi ka luajtur në të katër takimet e mëparshme, ato kundër Rumanise (1-1), Luksemburgut (1-0), Bosnje-Hercegovines (1-1) dhe Bjellorusise (0-2), duke luajtur 298 lojë dhe duke shënuar vetëm1 gol.

Megjithatë, forma e mirë që të dy sulmuesit, por sidomos Salihi, kanë treguar në takimet me klubet e tyre bën që trajneri kroat i kombëtares shqiptare, Josip Kuzhe, të shpresojë tek këta dy lojtarë. Shqipëria në katër ndeshjet e para kualifikuese ka grumbulluar pesë pikë: fitoi me Luksemburgun (1-0, në Tirane), barazoi me Rumaninë (1-1, në Pietra Neamnt) dhe Bosnjen (1-1, në Tiranë).

Tre golat e Shqipërisë mbajnë firmat e Gjergji Muzakës (kundër Rumanisë), Hamdi Salihit (kundër Luksemburgut) dhe Klodian Duros (kundër Bosnjes). Trajneri Josip Kuzhe nuk do të ketë qendërmbrojtësin Debatik Curri (të dëmtuar) dhe mbrojtësin e djathtë Armend Dallku (të pezulluar). I dëmtuar është dhe sulmuesi Edmond Kapllani, golashënuesi më i mirë i Shqipërisë në eliminatoret e Euro 2008 (5 gola).

Sporti Shqiptar , 2011-03-24 00:00:00