Kundërpërgjigjja e Agollit: Ata kanë sulmin, në mbrojtjen!

Me Rumaninë luajti në mesfushë, ndërsa me Luksemburgun në mbrojtje, Ansi Agolli pret vendimin e trajnerit

Si do të ndalen Dzeko, Misimoviç, Ibisheviç? Kësaj pyetjeje duhet t’i japë përgjigje vetëm i besuari i Kuzhes, Mustedanagiç, që tashmë ka marrë kompetencat e trajnerit. Shqipëria mund t’i kundërpërgjigjet lojës sulmuese boshnjake me anë të kundërsulmit të shpejtë, por sigurisht parësore mbetet loja e përkryer në mbrojtje. Ansi Agolli, që në dy ndeshjet e para elimnatore ka luajtur në tërë vijën e krahut të majtë, e ka përgjigjen për boshnjakët:

“Sulmi i Bosnjës, me emrat që ka, është ndër më të rrezikshmit në Europë. Do të mundihemi t’i përballojmë me aq mundësi sa kemi. Siç ka Bosnja lojtarë në sulm, kemi edhe ne në mbrojtje. Në këtë aspekt kemi qenë shumë të kujdesshëm në ndeshjet e fundit. Do të mundohemi që detyrat e trajnerit t’i zbatojmë me përpikëri. Nëse trajneri do të më kërkojë të përqendrohem vetëm në mbrojtje, do të mundohem ta bëj sa më mirë detyrën time, po kështu edhe nëse do të më kërkojë të hedh sytë nga sulmi.

” Sulmi kuqezi, me Bogdanin “pykë”, ka shumë nevojë për krosimet diagonale dhe të sakta të Agollit, megjithatë gjithçka varet nga mënyra e rreshtimit të skuadrës. “Unë kam luajtur në mbrojtje dhe në mesfushë, kështu që nuk e kam problem se ku do të aktivizohem. Kjo varet nga trajneri. Mesfusha të afron më shumë me portën dhe të jep mundësi të shërbesh për shokët.

Gjithçka do të varet detyrat që do të na japë trajneri, - vijon futbollisti i Karabakut në kampionatin azerbajxhanas. - Çdo ekip i fortë në Europë në shumicën e rasteve përqendrohet nga krahët. Bosnja i ka këta lojtarë, ndërsa ne do të mundohemi t’i përballojmë. Në Tiranë kanë ardhur kundërshtarë edhe më të fortë se Bosnja dhe janë ndalur, gjithsesi gjithçka varet se si do shkojë loja.

Dëshira ime është të fitojmë, por nuk kemi gjithçka në dorë.” Pa trajnerin Kuzhe në stol mund të jetë edhe më e vështirë për kuqezinjtë. Nga ana tjetër, problemi shëndetësor i trajnerit do t’i motivojë më shumë futvollistët në fushën e blertë. “Normalisht sëmundja e Kuzhes do ta motivojë më shumë skuadrën. Mendoj se do të mobilizohemi maksimalisht dhe do të japim gjithçka për ta fituar ndeshjen,” - përfundon Ansi Agolli.

Adi Metaliu , 2010-10-07 00:00:00