Kuzhe i angazhuar “full-time”, studion kundërshtarët

Josip Kuzhe ka ndjekur dje Bjellorusi-Honduras në Austri, ndërsa më 3 qershor do të ndjekë Gjermani-Bosnjë

Është zbuluar një nga arsyet kryesore pse trajneri i kombëtares shqiptare, Josip Kuzhe, i ka lënë të lirë dy ditë rresht kuqezinjtë para se të nisin përgatitjet për miqësoren e 2 qershorit me Andorrën. Dje kroati ka udhëtuar drejt Austrisë, ku kombëtarja e Bjellorusisë, kundërshtarja jonë në grup për eliminatoret e Euro 2012-s, ka zhvilluar miqësoren me Hondurasin, që është mbyllur 2-2. Kroati, me sa duket, kërkon të marrë informacion të plotë për kundërshtarët tanë, për të ndërtuar një strategji sa më efikase në takimet me këta kundërshtarë.

Sot Kuzhe do të mbërrijë në Shqipëri, për të nisur seancat stërvitore për miqësoren e radhës. Kuzhe gjatë kësaj periudhe grumbullimi të kuqezinjve ka qenë i angazhuar “full-time”, madje do të vijojë me studimin e kundërshtarëve tanë në grup edhe pas 2 qershorit. Vetëm 24 orë pas miqësores me Andorrën, Kuzhe do të jetë në Gjermani, për të ndjekur nga afër ndeshjen miqësore Gjermani-Bosnjë Hercegovinë. Ndonëse e njeh shumë mirë ekipin boshnjak, Kuzhe nuk dëshiron t’i shpëtojë asnjë detaj nga forca e kundërshtarit. Aq më tepër kur luan përballë njëkundërshtari me shumë emër, siç është Gjermania.

Bosnja dhe Rumania do të luajnë miqësore nesër pikërisht ndaj Suedisë dhe Ukrainës në transfertë, takime që trajneri ynë ndoshta do të mund t’i ndjekë vetëm nëpërmjet televizorit. Franca, skuadra më e fortë e grupit tonë, është ndeshur pardje në miqësore me Kosta Rikën, të cilën e ka fituar ngushtë 2-1. Francezët do të luajnë pasnesër me Tunizinë, para se të udhëtojnë drejt Afrikës së Jugut. Francezët janë të vetmit kundërshtarë të grupit tonë që do të luajnë në finalet e botërorit afrikan.

Adi Metaliu , 2010-06-02 00:00:00