Salihi: Fitorja u përket tifozëve kuqezinj

Sulmuesi i Riedit ka zhbllokuar rezultatin me një gol të mrekullueshëm në pjesën e dytë

Deri pak momente para shënimit të golit nuk kishte rënë në sy. Përkundrazi, në pjesën e parë nuk e kontrolloi si duhet të top të Bulkut, duke lënë përshtypjen se nuk po kalonte një moment të mirë. Por Hamdi Salihi di të befasojë edhe atëherë kur nuk e pret. Një gjuajtje kalibri nga rreth 22-23 metra nuk mund të ndalej nga portieri Bozhoviç.

Salihi ua ka dedikuar golin tifozëve kuqezinj që nuk kanë reshtur së përkrahuri skuadrën e zemrës: “Goli im ka shumë dedikime, por besoj së më shumë e meritojnë të gjithë tifozët që na kanë përkrahur sontë këtu në stadium, duke bërë që të ndihemi sikur të ishim në fushën tonë. Dhe nuk na kanë mbështetur jo vetëm sonte. Ne kemi kaluar shumë momente të vështira me mbështetjen e këtyre tifozëve të mrekullueshëm.” Shqipëria u tregua mjaft e kujdesshme në lojën mbrojtëse, duke hedhur shpesh sytë nga sulmi.

“Mendoj se po e ndërtojmë ekipin ashtu siç duhet. E nisim nga mbrojtja, mbrojmë të gjithë së bashku dhe kalojmë në sulm si skuadër. Ndeshjet e fundit e kemi realizuar shumë mirë lojën tonë. Sonte luajtëm shumë mirë në mbrojtje dhe shfrytëzuam të paktën një rast që na u dha para portës së Malit të Zi. Mendoj se ka ardhur momenti të shikojmë më shumë nga sulmi,” - ka vijuar Salihi, që suksesin e natës së mbrëmshme e ndan edhe me familjen e tij, që ishte thuajse e gjitha në shkallët e stadiumit: “Familja ka dedikim special.

Sonte më ka përkrahur e gjithë familja, por edhe kur luaj në Austri ata i ndiej shumë afër. Arritjet e mia pa dyshim që ia dedikoj në radhë të parë familjes, që e kam pasur mbështetjen më të madhe.”

Flasin protagonistët e tjerë
Erjon Bogdani: Një fitore e shumëpritur

“Pavarësisht se ishte një miqësore, loja ishte e fortë. Të gjithë futbollistët luajtën me zemër, siç kanë bërë gjithmonë në ndeshjet e kombëtares. Sonte e kemi merituar fitoren. Me Kuzhen kemi luajtur shumë ndeshje miqësore dhe tashmë ai e njeh mirë ambientin dhe futbollistët.

Ishte një fitore e shumëpritur. Tani është krejt normale që gjërat të vijnë duke u përmirësuar ndeshje pas ndeshjeje. Vetëm me Suedinë në transfertë mendoj se nuk kemi luajtur mirë. Mali i Zi është kundërshtar shumë i fortë dhe ka lojtarë që luajnë me ekipe me emër në Europë.

Nuk është arritje e vogël fitorja në fushë të huaj. Pas dy javësh do të kem edhe unë ceremoninë e martesës. Me Andorrën besoj nuk do të jem, sepse do të ketë hapësira për lojtarët e rinj. Pas 10 ditësh do të mësohet e ardhmja ime. Kam lajme të mira nga Leçe dhe Bolonja, megjithatë nuk mund të them asgjë me siguri.”

Cana: Fitorja, meritë e të gjithëve

“Kuzhe ka qenë që nga fillimi shqiptar. Kemi raporte mjaft të mira me trajnerin. Sigurisht që puna e tij është shumë e vështirë, për ta ngritur nivelin e skuadrës sonë. Po jep maksimumin me shumë sinqeritet. Kjo është një gjë e mirë për tifozët dhe të ardhmen e skuadrës përfaqësuese. Fitorja pa dyshim që ishte meritë e të gjithë ekipit, pasi lojtarët zbatuan mirë detyrat e dhëna nga trajneri.

Këtë gjë e kemi parë edhe tek Interi. Kemi kualitete, madje Salihi bëri një gol mjaft të bukur. Unë me shumë mundësi mund të qëndroj edhe një sezon te Sandërlendi, sepse marrëveshja ka qenë dyvjeçare. Pas këtij sezoni mund të bëj një lëvizje në një skuadër të madhe që do t’i kënaqë të gjithë shqiptarët.”

Duro: Ditë e shënuar për shqiptarët

“E kam thënë edhe më parë, që ne jemi një ekip i fortë, ku mbizotëron forca e kolektivit. Kemi dominuar ndaj Malit të Zi, aq më tepër që kemi pasur edhe mbështetjne tifozëve tanë, që janë të mrekullueshëm. Ne ishim shumë të karikuar përpara takimit për t’u dhënë sportdashëve tanë një gëzim. E realizuam qëllimin që kishim. Ishte një ditë shumë e veçantë për të gjithë shqiptarët, sepse me këtë fitore duhet të gëzojnë të gjithë. Me një fitore tjetër edhe ndaj Andorrës besoj se do të jemi optimistë përpara eliminatoreve të Europianit.”

Të veçanta

- Ervin Skela ka pasur marrje mendsh pas goditjes që pësoi gjatë dyluftimit me njërin prej lojtarëve vendas. Madje Skela ka dashur që të futet në lojë, por stafi nuk e ka lejuar. Fantazisti i përfaqësueses sonë ka marrë edhe dy të qepura në kokë.
- Dy përfaqësueset, Shqipëria dhe Mali i Zi, mbanin veshje të së njëjtës firmë, “Legea”.
- Mesditën e djeshme, tifozët kuqezinj i kanë dhuruar Kuzhes një shall, që kroati e ka mbajtur gjatë gjithë ndeshjes.
- Në mesin e pjesës së dytë ka pasur edhe një incident në tribunën qendrore, kur është hedhur edhe një tymuese, por më pas situata është normalizuar.
- Një pjesë të konsiderueshme të stadiumit e kanë zënë tifozët kuqezinj, që nuk kanë reshtur së brohorituri për përfaqësuesen tonë. Madje, kur Salihi ka shënuar gol, ata kanë nxjerrë një banderolë të madhe me foton e sulmuesit shkodran.

Adi Metaliu , 2010-05-26 00:00:00