K.Duro: S’ka shumë kohë, shtatori është afër!

Mesfushori i Apollonit të Limasoli, Klodian Duro, sheh një ambient optimist në kombëtare

Klodian Duro bën pjesën në atë grup futbollistësh të kombëtares që kanë shpërthyer në fillim të viteve 2000 dhe që vazhdojnë edhe sot të përbëjnë shtyllën e përfaqësueses sonë. Shumëkush mund të mendojë që ai dhe disa të tjerë duhet t’u hapin vendin të rinjve, por fusha e blertë nuk “mendon” kështu. Duro vazhdon të luajë në nivele të larta, duke fituar trofe me Apollonin e kampionatit qipriot. Në prag të miqësores me Malin e Zi, Duro tregon për sezonin e fundit në Qipro si dhe mundësinë për të ndryshuar ambient. Për të Mali i Zi dhe Andorra janë teste të rëndësishme para fushatës eliminatore të Euro 2012-s.

- Kodian, mbyllët sezonin e dytë në kampionatin qipriot. Cili është bilanci juaj?
- Po ta kapësh në dy plane, mund të konsiderohet sezon shumë pozitiv për ekipin, që pas 5 vjetësh merr pjesë në Kupat e Europës. Këtë objektiv e arritëm edhe nga kampionati, por qershia mbi tortë është fitimi i Kupës. Për një klub si Apolloni, që nuk shijonte prej shumë vitesh trofe, kjo ishte arritje e madhe. Ishte një sezon shumë i mirë pas atyre investimeve. Sa i përket planit personal, nuk është e lehtë të shkosh nga Omonia në një skuadër tjetër dhe të fitosh zemrat e tifozëve. Brenda futbollit ka ndryshime të shpeshta. Brenda ndryshimeve ka edhe ndryshim skuadrash, trajnerësh etj. Por ne jemi futbollistë profesionistë.

Tregojmë atë që dimë të bëjmë. Në këtë sezon çdo gjë përfundoi me sukses.
- Në media janë shtuar zërat për një largim të mundshëm nga Apolloni…?
- Media ka punën e vet. E vërteta është se kam edhe një vit kontratë me Apollonin. Deri ditën e fundit kam pasur marrëdhënie mjaft korrekte me klbin, jemi ndarë në mënyrën më të mirë të mundshme. Janë thjesht hamendësime të mediave qipriote, por që janë transmetuar edhe këtu në Shqipëri. Idetë e mia janë të qarta: dua të vazhdoj me Apollonin.
- Atmosfera në kampin kuqezi duket shumë pozitive…?
- Gjithmonë në ekipin kombëtar, për sa kohë që jemi bashkë, atmosfera është pozitive. Unë kam kohë në kombëtare dhe fryma e grupit sa vjen e përmirësohet. Këto dy tri vitet e fundit, me ardhjen e trajnerit Kuzhe, ambienti është shumë i qetë. Këtu ke qejf të vish e të rrish sa më shumë në kombëtare. Edhe të rinjtë që janë grumbulluar besoj se kanë gjetur një ambient të mirë në grupin tonë. Ndihen të qetë dhe tregojnë gjithçka kanë, pa pasur presionin më të vogël.

- Si i keni përceptuar këto ditë të para stërvitore?
- Është një grumbullim që i bën mirë grupit. Kemi pasur mundësi të mblidhemi dhe të njihemi më mirë me lojtarët e rinj. Ambienti është entuziast dhe pozitiv.
- Mali i zi, një kombëtare që ka potencial të madh, miqësorja e parë për Shqipërinë…?
- Është një miqësore-test për të ardhmen. Duam të bëjmë hapin e madh si Shqipëri, kur shohim skuadra si Mali i zi dhe Bosnja që marrin rezultate të mëdha. Realisht na vjen keq që nuk arrijmë rezultate si këto skuadra. Për më tepër, kur flasim për ndryshimin e skuadrave, ne duhet të rrisim cilësinë e kampionatit tonë. Diferenca mes nesh dhe shteteve të tjera është profesionalizmi. Ne nuk duhet të mbetemi pas, por të jemi profesionistë të vërtetë. Hapin galopant duhet ta hedhin klubet. Duhet të ndryshojnë në mënyrën e administrimit, të kthehen në klube private dhe të futen gjërat në shinat e profesionalizmit. Këtu mund të ndihmojnë edhe futbollistët e ekipit kombëtar, që kanë luajtur jashtë dhe që mund të japin eksperiencën e tyre nga klubet e huaja.

- Sa rëndësi ka rezultati me Malin e Zi?
- Ka shumë rëndësi. Sepse me një rezultat të mirë ngrohet atmosfera dhe të gjithë do të jemi të kënaqur. Lojtarët lidhen më shumë dhe rritet besimi për ndeshjet e ardhshme, sidomos në eliminatoret që na presin në muajt në vazhdim. Shtatori duket larg, por unë mendoj se është shumë afër. Veç formimit të skaudrës, ne duhet të marrim rezultate pozitive. Për më tepër që në futboll të gjithë kanë dëshirë të fitojnë.

Pushimet e Duros, nga Tirana në Spanjë
Një vit më parë Klodian Duro lidhi kurorë dhe për fatin e tij të mirë nënshkroi një kontratë të kënaqshme me Apollonin. Një vit më pas sukseseve të tij i shtohet Kupa e Qipros, e fituar me Apollonin. Vjet pushimet verore i kaloi në Montekarlo, ndërsa sivjet ka planë të tjera: “Pas një sezoni të gjatë dhe të lodhshëm dhe pas angazhimit me ekipin kombëtar do të kthehem në Tiranë te familja ime, ku do të qëndroj disa ditë. Më pas do të udhëtoj me bashkëshorten drejt Spanjës.”

Duro pragmatist, parapëlqen Italinë
“Kam qenë dhe jam tifoz me Italinë, sepse idetë e mia për këtë lojë janë të ngjashme me futbollin italian. Është e vërtetë që kanë probleme brenda skuadrës, por ata janë shumë të fortë dhe mund t’i bëjnë ballë çdo furtune. Mjafton të kujtojmë botërorin e fundit në Gjermani, ku fitoi Kupën e Botës. Edhe këtë vit do të jetë dinjitoze. Do të rivalizojë me Spanjën, Argjentinën, Gjermaninë e Anglinë. Nuk e përmenda Brazilin në fillim se dihet që është gjithmonë pretendent.”

“Niko Dovana” s’është gati, me Andorrën në Qemal Stafa
Miqësorja me Andorrën më 2 qershor do të luhet në mbrëmje në ndërkombëtarin “Qemal Stafa”. Në fakt, FSHF kishte parashikuar të provonte ndriçimin artificial të “Niko Dovanës”, por punimet nuk mund të përfundojnë para kësaj date. Gjithsesi, sezoni i ri futbollistik do ta gjejë infrastrukturën e futbollit të përmirësuar, pasi në disa stadiume do të jenë instaluar impiantet e ndriçimit.

Adi Metaliu , 2010-05-23 00:00:00