Kuq e zinjtë humbin 4 pozicione në renditjen e FIFA

Shqipëria ka humbur 4 vende në renditjen e përmuajshme të FIFA-s, të publikuar më 16 tetor.

Shqipëria ka humbur 4 vende në renditjen e përmuajshme të FIFA-s, të publikuar më 16 tetor. Humbja 4-1 në Suedi ka bërë që kombëtarja shqiptare të ketë 26 pikë më pak në krahasim me shtatorin, ç’ka do të thotë se çështja e vazos së katërt është praktikisht e mbyllur. Madje Qipro, që ishte rivali ynë direkt, ndodhet në vendin e 60-të në botë. Shqipëria ndodhet në vendin e 97-të, një nga më të ultët e viteve të fundit. Në këtë mënyrë, në shortin e ardhshëm për eleminatoret e Europianit, që hidhet më 7 shkurt, përfaqësuesja kuqezi do të ketë vetëm një skuadër më të dobët në grup. Në zonën europiane Shqipëria renditet në vendin e 43-të, duke u kaluar edhe nga ekipe si Mali i Zi, Maqedonia apo Moldavia.
Përsa i përket renditjes së përgjithshme, vendi i parë në Botë mbahet nga Brazili, i ndjekur nga Spanja dhe Holanda. Italia renditet e katërta pas barazimit me Irlandën dhe fitores me Qipron, ndërsa Gjermania e pesta. Më pas renditen Argjentina, Anglia, Kroacia dhe Franca. Mes 10 më të mirëve është rikthyer edhe Portugalia, që ka siguruar tashmë fazën e plejofit.

Altin Latifi (d.b/BalkanWeb) , 2009-10-16 00:00:00