Vetëm 7 pikë, kombëtarja kuqezi na riktheu 10 vite pas

Rezultatet e kombëtares sonë me trajnerë të huaj janë në rënie të lirë, Han-Kuzhe rezultatet më të dobëta

Humbja e dy netëve më parë me Sedinë, në ndeshjen e fundit në grup për eliminatoret e Botërorit 2010, la një shije të hidhur për sportdashësit shqiptarë, që me të drejtë shpresonin për një rezultat pozitiv. Në fakt, ky fund ishte i paracaktuar që me largimin e Ari Hanit në pranverë, pasi në tri ndeshjet që kishin mbetur, jo vetëm Kuzhe, por kuzhdo trajner që do ta merrte drejtimin e kombëtares sonë do ta kishte shumë të vështirë të merrte pikë. Josip Kuzhe mori vetëm një pikë, me Danimarkën në “Qemal Stafa”. Në përfundim të këtyre eliminatareve ia vlen t’i bëhet një skaner hollësishëm jo vetëm fushatës së së botërorit afrikan, por gjithë eksperiencës së trajnerëve të huan në krye të kuqezinjve, që korrespondon me erën “Duka” në krye të FSHF-së. Trajnerët e huaj janë punësuar me një qëllim: të rritin prestigjin e kombëtares sonë në arenën ndërkombëtare, duke grumbulluar sa më shumë pikë. Që nga viti 2002, kuqezinjtë janë drejtuar nga 5 trajnerë të huaj: Dosena, Brigeli, Bariçi, Hani dhe së fundi Kuzhe. Nëse do të bënim një krahasim të rezultateve të kombëtares me trajnerë të ndryshëm, do të vëmë re në dy eliminatoret e fundit kemi rënie, sidomos për Botërorin 2010.

Brigeli dhe rekordi i Shqipërisë

Në fakt, para së të flitet për epokën “Brigel” duhet theksuar se dy ndeshjet e para kualifikuese të Euro 2004-ës janë drejtuar nga Dosena (Shqipëri-Zvicër 1-1 dhe Rusi-Shqipëri 4-1). Shqipëria kishte rënë në një grup me Rusinë, Zvicrën, Irlandën dhe Gjeorgjinë. Pra, në një grup me 5 skuadra, ndër të cilat vetëm Gjeorgjia mund të konsiderohej në nivelin e Shqipërisë. Të tjerat ishin më lart. Në fund të këtyre eliminatoreve Shqipëria grumbulloi 8 pikë, la me një pikë më pak poshtë vetes Gjeorgjinë, ndërsa fitorja me Rusinë në “Loro Boriçi” ishte ndeshja për t’u mbajtur mend. Po kaq pikë Shqipëria pat grumbulluar edhe gjatë eliminatoreve të Botërorit 2002, por me një kundërshtar më tepër. Në 8 ndeshje të luajtura Shqipëria grumbulloi 8 pikë, me një mesatare 1 pikë për ndeshje.

Fushata kualifikuese për Botërorin 2006 i konsiderua sfida e radhës e Hans Peter Brigelit, që mori bekimin e Dukës për ta drejtuar edhe dy vite të tjera Shqipërinë. Gjermani e njihte shumë mirë skuadrën, pasi për gati dy vjet e kishte drejtuar për Euro 2004. Filimi qe mbresëlënës. Në ndeshjen e parë në grup, me Greqinë e saposhpallur kampione e Europës, Brgieli korr suksesin më të madh. 2-1 për Shqipërinë dhe lind ëndrra për kualifikim. Shqipëria është me fat, pasi ka në grup Kazakastanin, që merr për herë të parë pjesë në një kompeticion kaq të rëndësishëm. Përveç tripikëshit të parë me Greqinë, kuqezinjtë arkivojnë pikët e plota me Kazakistanin, por nuk marrin atë që pretendonin në shtëpi me Danimarkën dhe Ukrainën. Një pikë në transfertë me Ukrainën e kualifikuar s’mund të konsiderohet arritje e madhe. Në ndeshjen e fundit në “Qemal Stafa” Shqipëria i “dhuron” kualifikimin Turqisë. Bilanci në fund të eliminatoreve: 13 pikë në 12 ndeshje, me një mesatare afërsisht 1.1 pikë për ndeshje. Ky është rekordi i Shqipërisë në të gjitha kohët.

Lindja dhe shuarja e shpresës me Bariçin

Hans Peter Brigel nuk ra dakord pre presidentin e FSHF-së, Armand Duka për zgjatjen sërish të kontratës, kështu që u desh një tjetër zgjedhje. Ai ishte Oto Bariç, trajneri me CV-në më të pasur që ka drejtuar kombëtaren e Shqipërisë. Kuqezinjtë mund ta kishin thyer rekordin e Brigelit, nëse do ta mundin në ndeshjen e parafundit në grup Bjellorusinë në “Qemal Stafa”. Janë pikërisht përballjet Shqipëri-Bjellorusi 2-4 dhe Rumani-Shqipëri 6-1 që ndikuan në vendimin e Oto Bariçit për të mos e rinovuar kontratën. Megjithëse kombëtarja jonë la pas në renditje Luksemburgun dhe Slloveninë, fundi që mjaft zhgënjyes. Ndryshe nga kombëtarja e Brigelit, ajo e Bariçit pësojë ulje në rezultate. Në 12 ndeshje në grup u grumbulluan 11 pikë, pra më pak se një pikë për ndeshje.

Han-Kuzhe, Shqipëria në origjinë

Gjatë eliminatoreve të Euro 2000 Shqipëria drejtohej nga Astrit Hafizi dhe arriti të grumbullonte 7 pikë në një grup me 6 skuadra. Hafizit nuk iu dha e drejta të drejtonte edhe eliminatoret e Botërorit 2002 sepse kërkoheshin rezultate më të mira. Po kaq pikë, pra 7, dhe po me kaq skuadra në grup, ka grumbulluar Shqipëria në eliminatoret e fundit. Në njëfarë mënyre është kthyer 10 vjet prapa. Emërimi i bujshëm i Ari Hanit pas dështimit të tratativave për të rinovuar me Bariçin bëri jehonë në Shqipëri. Bëhej fjalë për një emër të madh të futbollit të viteve ‘70. CV-ja e tij ishte e pasur, po kështu edhe starti në krye të Shqipërisë, që barazoi në ndeshjen e parë me Suedinë në “Qemal Stafa” dhe fitoi 3-0 me Maltën. Vendi i parë i përkohshëm në krye të grupit ishte një iluzion, që më pas do të kthehej në makth. Në ndeshjet pasardhëse Shqipëria bëri një figurë të keqe (përjashto barazimin me Portugalinë në Bragë). Dy humbjet me Hungarinë dhe barazimi në Maltë e nxorrën “lakuriq” Hanin, që pas humbjes 3-0 në Danimarkë u shkarkua nga presidenti Duka për rezultate të dobëta. Fati i Shqipërisë tashmë ishte percaktuar. Emërimi i Josip Kuzhes u prit disi me skepticizëm. Situata ishte tepër e rëndë. Shqipëria e kroatit u mund në minutat shtesë 2-1 nga Portugalia, barazoi 1-1 me Danimarkën dhe humbi ndeshjen e fundit 4-1 me Suedinë. Josip Kuzhe nuk mund të paragjykohet për 7 pikët e grumbulluara, që janë shumë pak për synimet e Shqipërisë. Bilanci në fund të eliminatoreve është shumë shqetësues: 7 pikë në 10 ndeshje, me një mesatare 0,7 pikë për ndeshje. Dhe në fund lind me të drejtë pyetja: Sa ia ka vlejtur që kemi marrë trajnerë të huaj?

Euro 2004 (1 pikë/ndeshje)

Trajner: Dosena/Brigel

Zvicër 8 4 3 1 15-11 15

Rusi 8 4 2 2 19-12 14

Irlandë 8 3 2 3 10-11 11

Shqipëri 8 2 2 4 11-15 8

Gjeorgji 8 2 1 5 8-14 7



Botërori 2006 (1.1 pikë/ndeshje)

Trajner: Hans Peter Brigel

Ukrainë 12 7 4 1 18-7 25

Turqi 12 6 5 1 23-9 23

Danimarkë 12 6 4 2 24-12 22

Greqi 12 6 3 3 15-9 21

Shqipëri 12 4 1 7 11-20 13

Gjeorgji 12 2 4 6 14-25 10

Kazakistan12 0 1 11 6-29 1



Euro 2008 (0.92 pikë/ndeshje)

Trajner: Oto Bariç

Rumani 12 9 2 1 26-7 29

Holandë 12 8 2 2 15-5 26

Bulgari 12 7 4 1 18-7 25

Bjellorusi12 4 1 7 17-23 13

Shqipëri 12 2 5 5 1-18 11

Slloveni 12 3 2 7 9-16 11

Luksemburg12 1 0 11 2-23 3

Botërori 2010 (0.7 pikë/ndeshje)

Trajner: Han/Kuzhe

Danimarkë 10 6 3 1 16-5 21

Portugali 10 5 4 1 17-5 19

Suedi 10 5 3 2 13-5 18

Hungari 10 5 1 4 10-8 16

Shqipëri 10 1 4 5 6-13 7

Maltë 10 0 1 9 0-26 1



Kuzhe, gati rrëfimin për dështimin dhe të ardhmen

Trajneri i kombëtarës shqiptare, kroati Josip Kuzhe, do të dalë sot në orën 11:00 në një konferencë për shtyp në ambientet e FSHF-së. Sipas burimeve pranë FSHF-së, Kuzhe do të analizojë punën që ka bërë në tri ndeshjet e fundit kualifikuese, sidomos humbjen e fundim me Suedinë si dhe do të shpjegojë planin për të ardhmen.





Botërori 1990, rekordi negativ i Shqipërisë

Nëse do të kthehemi pas në kohë, pikërisht në eliminatoret e Botërorit “Italia 1990″, Shqipëria ka shënuar rekordin negativ të rezultateve. Kuqezinjtë kishin në grup Suedinë, Anglinë dhe Poloninë. Në atë kohë fitorja vlente 2 pikë, ndryshe nga sot. Shqipëria zhvilloi 6 ndeshje në grup, duke i humbur të gjitha përballjet. Edhe në vitet ‘90 rezultatet e Shqipërisë kanë lënë për të dëshiruar. Madje 8 pikët e grumbulluara nga Neptun Bajko, në fund të eliminatoreve të Euro 1996, u konsideruan arritje e madhe.



Pikët që ka grumbulluar Shqipëria pas 1990-s

1990 (botëror): zero pikë

1992 (europian) 2 pikë

1994 (botëror): 4 pikë

1996 (europian): 8 pikë

1998 (botëror): 4 pikë

2000 (europian): 7 pikë

2002 (botëror): 3 pikë

Adi Metaliu , 2009-10-16 00:00:00